Salatu dute Ertzaintzak GKSko kide bat atxilotu duela Itziarren
Gazte Koordinakunde Sozialistak jakinarazi duenez, behin-behinean espetxeratuko dutela esan diete, sei hilabeterako gutxienez. Gertakaria salatzeko, mobilizazioa egingo dute Urruñako plazan, 19:00etan.
GKS Gazte Koordinakunde Sozialistak sare sozialen bidez eman du berria: bart gauean Ipar Euskal Herriko GKSko kide bat atxilotu du Ertzaintzak, Itziarren (Deba, Gipuzkoa).
Salatu dutenez, kidea atxilotuta daukate oraindik. Gainera, haien hitzetan, Poliziak atxiloketaren unean jakinarazi dio behin-behinean espetxeratuko dutela, sei hilabeterako gutxienez. Gazte lapurtarra, oraingoz, Eibarko komisarian daukate (Gipuzkoa). Gaur-gaurkoz, ez dute esan zer leporatzen dioten, baina, GKSren arabera, dirudienez duela lau urteko auziren batekin lotuta dago atxiloketa.
GKSk kidea berehala baldintzarik gabe aske uzteko eskatu du. Gainera, «elkartasuna eta babes osoa» helarazi diete sendiari eta lagunei. Gertatutakoa salatzeko, mobilizazioa egingo dute Urruñako plazan (Lapurdi), 19:00etan hasita.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
