Albistea entzun

Energia

Petronorrek bi urte barru martxan nahi du erregai sintetikoen planta

103 milioi euroko inbertsioa egingo du, eta dagoeneko eraikitzen hasi da. Bilboko portuko deskarbonizazio nukleoko lehen azpiegitura izango da.

Iñigo Urkullu Lehendakaria lurra botatzen Petronorren planta berriaren lehen harriaren gainean.
Iñigo Urkullu Lehendakaria lurra botatzen Petronorren planta berriaren lehen harriaren gainean. Miguel Toña / EFE Tamaina handiagoan ikusi

Imanol Magro Eizmendi -

2022ko maiatzak 27

Bilboko portuan martxan jarri asmo duen deskarbonizazio nukleoa eraikitzeko prozesua hasi du Petronorrek. Erregai sintetikoen plantak eta hiri hondakinak pirolisi bidez energia bilakatzeko proiektuak osatuko dute lehen azpiegitura. Egitasmoak 103 milioi euroko kostua izango du, eta hemendik bi urtera lanean hasita egotea da erregai konpainiaren asmoa. Hidrogenoaren euskal korridorearen katebegi garrantzitsuenetakoa da, eta Petronorrek Jaurlaritzaren babesa eta Kutxabanken finantzaketa lortu ditu proiektua bultzatzeko.

Petronorren 67 milioi euroko inbertsioa egin zuen Bilboko portuan 46.700 metroko koadroko orube bat erosteko, eta bertan egin dute lehen harria jartzeko ekitaldi sinbolikoa. Hiru faseko egitasmo bat da, eta, Emiliano Lopez Atxurraren iritziz, proiektu horrek «etorkizunera» eramango du portua. «Trantsizio energetikoa ez da esprinta, maratoia baizik, eta oinak lurrean ditugula egin behar dugu. Ezin dugu egin CO2 emisioak atzerrira bidaliz eta industria urrunduz».

Plantan erregai sintetikoak ekoitziko ditu Petronorrek, eta, Josu Jon Imaz Repsoleko kontseilari ordezkariaren iritziz, ezinbestekoak dira CO2rik isurtzen ez duten erregai likidoak: «Elektrifikazioa garrantzitsua da, baina dena ezin da elektrifikatu: hegazkinak, itsasontziak, industria astuna, porlanarena… horiek erregaiak behar dituzte, eta hori egin nahi dugu findegi honetan». Imazek azaldu du prozesua. Industriatik sorturiko CO2dun likidoak gorde egiten dira lehenbizi, Petronorrek petrolio findegikoak adibidez. Haiek karbono monoxidora murritzen dira (CO), eta plantan bertan egongo den 10 MWko elektrolizagailu batekin sorturiko hidrogenoa gehituko diote –energia berriztagarriekin uraren osagaiak banatuz—, eta hidrokarburo bat sortu, «hegazkinek kutsatu ez dezaten». Bultzatzaileen arabera, plantak 18.000 upel erregai sintetiko ekoitziko ditu lehen urtean, Bilbo eta Madril arteko hegaldiek urte batean erabiltzen duten erregai kantitatea.

Imazek sutsu hitz egin du erregai sintetikoen alde; besteak beste, petrolio konpainia bateko zuzendaritzako kide delako: «Elektrifikazioaren alde bakarrik apustu egiten badugu, beste menpekotasun energetiko baten menpe egongo gara. Orduan, Txinako materialak eta lur arraroek baldintzatuko gaituzte». Era berean, Atxurrarekin bat egin du CO2 igorpenen esportazioa kritikatzean: «Gure CO2 isuriak murrizten ditugu, baina Txinara bidaltzen ditugu. Txinako altzairutegiek Europa osokoek baino CO2 gehiago isurtzen dute, eta lurraren beroketa mundu mailako auzi bat da».

Kutxabanken finantzaketa du proiektuak, eta, besteak beste, EVEren, Enagasen eta Aramco Saudi Arabiako enpresaren laguntza teknologikoa. Bultzatzaile guztiek, dena den, nabarmendu dute proiektua ezinezkoa zatekeela Eusko Jaurlaritzaren babesik gabe. Haren izenean, Iñigo Urkullu lehendakariak gogoratu du EAEk «lider» izan nahi duela trantsizio energetikoan, eta eraginkortasun energetiko handiena duten «Europako lau herrialdeetako bat» izan asmo duela. Halaber, azaldu du trantsizio energetikoa «aukera bat» dela, baina batez ere «premia» bat dela: «Nukleo hau lehen pausoa da, baina gehiago etorriko dira». Hidrogenoaren euskal korridorea, esaterako, 1.300 milioi euroko egitasmo bat da, eta 2026rako hidrogenoa banatu ahal izatea du helburu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

CCOO, LAB eta UGT sindikatuen protesta bat, pasa den abenduan ©Oskar Matxin Edesa (Foku)

Bizkaiko metaleko lan itunean sindikatuetako afiliatuek izango dute azken hitza

Jokin Sagarzazu

CCOOk, LABek eta UGTk begi onez hartu dute Eusko Jaurlaritzaren bitartekaritzaren proposamena. 2022-2025eko eperako %15eko soldata igoera metatua jasotzen du. ELA aurka azaldu da.

Onkologikoko garbitzaileak, lehen greba egunean. ©ELA Sindikatua

Gipuzkoako Onkologikoko garbitzaileek hogei eguneko grebari ekin diote

Iñaut Matauko Rada

Onkologikoaren ondoko errepidea ordu erdiz moztu dute protesta batean. Kaleko garbitzaileek baino %25 gutxiago irabazten dutela salatu dute.

Gasteizko Eroski supermerkatuko irudi bat. ©Jaizki Fontaneda / FOKU

Inflazioak %5,8ra egin du gora urtarrilean

Iñaut Matauko Rada

Erregaiak garestitu izanak handitu du batez ere inflazioa, nahiz eta oinarrizko elikagaien prezioek behera egin duten, BEZaren jaitsieragatik.

Nissan eta Renaulten logoak, Bruselan, autoen erakuketa batean ©STEPHANIE  LECOCQ

Nissanek eta Renaultek euren arteko aliantza berritu dute

Maddi Iztueta Olano

Akordioan jasotakoaren arabera, aurrerantzean Nissanen kapitalaren %15 izango du Renaultek. Orain arte, horren %43 zuen.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.