Euskal Hirigune Elkargoak turismorako bizitegien hazkundeari aurre egiteko erabakia hartu zuen martxoaren hasieran. Haren arabera, turismorako bizitegi bat alokagai jartzen dutenek urte osoan beste bat eskaini beharko zuten, konpentsatzeko. Ordea, etxeen jabeen kolektiboak helegitea jarri zion, eta arrazoia eman dio Paueko Administrazio Auzitegiak: suspenditu egin du konpentsazio neurria.
Beren etxebizitza nagusia urtean 120 egunez baino gehiagoz alokatzen duten jabeei zegokien neurria, baita bigarren etxebizitza aldi baterako alokairuan eskaintzen dutenei ere. Konpentsatzeko bizitegia hiri berean eskaini behar zuten, eta gutxi gorabehera ezaugarri berak izan behar zituen.
Erabakiaren berri izan ondoren, Jean Rene Etxegarai Euskal Elkargoko lehendakariak eta Daniel Olzomendi eta Filipe Aramendi elkargoko hautetsiek agerraldia egin zuen, deliberoa kritikatzeko: «Gaur interes kolektiboak galdu du, eta interes pribatuak irabazi», arbuiatu zuen Olzomendik. Erabakia larria dela adierazi zuen Aramendik. Elkargoak helegitea aurkeztuko du Frantziako Estatu Kontseiluaren aitzinean datorren astelehenean, baina hilabeteak beharko dira hura ebazteko.
EH Baik epaitegien erabakia gaitzetsi du: «Haserre handia eragiten duen deliberoa da gaurkoa». Izan ere, herritarrentzat kaltegarria iruditzen zaie: «Helegitea pausatzearekin, Ipar Euskal Herriko biztanleek bertan bizitzeko duten eskubidea urratzen da».
Erabakiak erabaki, borrokan jarraitzeko asmotan da EH Bai: «Etxebizitza arloan, ezin dugu denbora gehiago galdu». Horregatik, Joko arauak alda ditzagun kanpainarekin jarraituko dute, eta esan dute lanean jarraituko dutela Herrian bizi plataformaren baitan ere. «Espekulatzaileen kontra, gure etxebizitzak diru iturri gisa kontsideratzen dituztenen kontra hartzen diren iniziatiba guziak sustengatzen ditugu». Etxebizitza eskubidearen alde egiteko, EH Bai bozkatzeko ere eskatu diete herritarrei: «Heldu den ekainaren 12an, EH Bairen bozka papera da bakarra joko arauak aldatu nahi dituenak».
Alda mugimenduak txalotu egin zuen elkargoaren erabakia, eta orain kritikatu du auzitegiak men egin diela «zenbait lobby-ren» eskakizunei, «gutxi batzuen interes pribatua lehenetsita». Halere, ziurtatu du borrokan jarraituko dutela, eta herritarrei dei egin diete «inoiz baino gehiago mobilizatzera».
