Albistea entzun

Araba Euskaraz

Gelak ituntzeko irizpidea aldatzea leporatu dio Tellituk Jaurlaritzari

Datozen sei urteetarako planifikazioan aldaketa «bat-batean» egin izana salatu du Ikastolen Elkarteko zuzendariak Araba Euskaraz-en hasiera ekitaldian, Jokin Bildarratz Hezkuntza sailburua aurrean zela. Horrek erantzun dio ez dela horretarako eguna, ezta gonbidatu bat hartzeko modua ere.

Bildarratz, ezkerretik lehena, eta Tellitu, eskuinetik bigarrena, gaur goizeko hasiera ekitaldian. /
Bildarratz, ezkerretik lehena, eta Tellitu, eskuinetik bigarrena, gaur goizeko hasiera ekitaldian. / Jaizki Fontaneda/Foku Tamaina handiagoan ikusi

Jon Ordoñez Garmendia -

2022ko ekainak 19

Gaur goizeko hamarretan abiatu da Araba Euskarazen 42. aldia, Olarizun, Argantzon ikastolaren alde. Beroa zen eguneko protagonista nagusia izatekoa, baina hasiera ekitaldian Koldo Tellitu Ikastolen Elkarteko lehendakariak eta Jokin Bildarratz Hezkuntza sailburuak izan duten xextra izan da goizeko hizpide nagusietako bat.

Hasiera ekitaldian Liher Larrea Arabako ikastolen ordezkariak esan du «ezberdintasunak alde batera utzi eta elkarrekin dantzatzen ikasi» behar dela. Ondoren, ordea, honela mintzatu da Tellitu: «Ospakizun eguna izanik ere, badira ikastoloi egunaz guztiz gozatzea eragozten dizkigun laino batzuk ere». Ondoren, azaldu du hezkuntza itunean jasotako Euskal Hezkuntzaren Zerbitzu Publikoaren ideia ez dagoela gehiegi barneratuta hezkuntza komunitatean eta sindikatuetan, ezta alderdi politikoen artean ere.

«Guk euskal hezkuntza zerbitzu publikoa kontzeptua erabiltzea nahiko genuke, eta geure buruari galdetzen hasi gara ea akordioa sinatu duten alderdiek benetan horretan sinesten duten. Legea mahai gainean egoteko gutxi falta da, eta egoera horrek kezkatzen gaitu. Geure buruari galdetzen diogu benetan berdinak izango garen, eskubide eta betebeharrei dagokienez, Euskal Hezkuntza Zerbitzu Publikoan sartuko garen ikastetxeak. Eta, zehatzago esanda, eta akordioaren sinatzaileei zuzenduta, argi duzue ikastolek hezkuntza sistemaren etorkizunean izango duten zeresana eta zeregina zein den?», galdetu du Tellituk.

Eta gero zuzenean zuzendu zaio Hezkuntza Sailari, sailburuaren aurrean. Tellituk salatu du Araba, Bizkaia eta Gipuzkoako planifikazioa egiteko orduan «bat-batean» gelak ituntzeko irizpidea aldatu egin dela, eta arriskuan jartzen ari direla ikastola txikiek bizirik irautea, lerro bakarrekoentzat: «Proposatutako planifikazio ereduak gelak ixtea ekar bailezake, eta, sei urterako denez, hemendik sei urtera oso egoera larrian gera bailitezke». Ez du alferrik esan Olarizun, Argantzon ikastola baita Arabako txikiena. 2003ko urriaren 27an ireki zuten, eta egun 68 ikasle ditu. 2021-2022ko ikasturtean, Haur Hezkuntza eta Lehen Hezkuntza ikastola horretan osorik egin duen lehen promozioa irtengo da bertatik.

Tellituk esan du arazo hori konpondu beharrekoa dela, eta euren ustez ez duela konponbide zaila. «Itxoin daiteke legea adostu arte ere, baina, bitartean, akordioak behar ditugu. Hezkuntza Sailaren eskuetan dago hori bideratzea. Egun dagoen planifikazioa ez dugu onartzen, baina egingarria ikusten dugu akordioa, duela hiru asteko planteamendura itzulita. Gu prest gaude, baina garbi utzi nahi dugu ere ez dugula ikastola bakar bat ere itxiko».

Hitza hartu duenean, Bildarratzek esan du gaurkoa festa eguna dela, eta ez dela horretaz hitz egiteko eguna. Gainera, erantzun dio ez dela hori gonbidatu bat hartzeko modua ere.

Beroa eta omenaldiak

Euskaltzaleak goizean goizetik bildu dira Olarizun, egun hauetako beroari aurre eginez. Goizean fresko bazegoen ere, lehen orduak pasatu ahala tenperaturak gora egin du, eta itzala eta eguzkitako krema dira eskura izan beharrekoak, besteak beste. Ibilbidea motza da, baina Haritza, Pagoa eta Ametza guneetan aukera ugari dago heldu eta haurrentzat. 19:00etan amaituko da jaia.

8. alaba lelopean egiten ari dira jaia, Arabako zortzi ikastolek antolatua, Argantzongo ikastolarentzat eraikin berri bat egin ahal izateko dirua biltzeko helburuz. Zortzi ikastoletako bakoitzean komunitatearentzat lan aipagarria egin duen pertsona bana omendu dute; horiekin batera, Anjel Olalde ere omendu dute, hainbat urtetan Araba Euskaraz antolatzeko koordinazio lanetan egindako lanagatik.

Gainera, Arabako Alea aldizkariari ere omenaldia egin diote ekitaldian, «Araban euskararen alde auzolanean dabilen eta Araba Euskaraz-ekin ere askotan eskuz esku ibiltzeagatik».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA
Miarritzeko harrotasunen martxa, atzo. ©BOB EDME

«Mugak hausteko» harrotasunez hartu dituzte Miarritzeko karrikak

Oihana Teyseyre Koskarat

Ehunka lagun bildu dira harrotasunaren martxan. LGTB komunitateko eragileek nabarmendu dute gora egin dutela horien kontrako erasoek
Barakaldon eraso matxisten aurka egindako elkarretaratze bat, aurtengo martxoan. ©MARISOL RAMIREZ / FOKU

Gizon bat espetxeratu dute, neska lagun ohia hiltzen saiatzea egotzita

Jon O. Urain - Maddi Ane Txoperena Iribarren

Labanaz eraso dio andreari, eta emakumea larri dago, Gurutzetako ospitalean. Basauriko kartzelan sartu dute gizona. Mugimendu feministak elkarretaratzera deitu du gaur arratsalderako Barakaldon

Osasun zentro bateko sarrera, artxiboko irudi batean. ©MAIALEN ANDRES / FOKU

Bere burua hiltzen saiatu direnen arreta hobetzeko prozedura, abian

Oihane Puertas Ramirez

Oraintsuko Suizidio Ahaleginaren Kodea Osakidetzako sare osoan dago erabilgarri

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...