Lau lagun atxilotu ditu Frantziako Poliziak goizean Senpereko inguruetan (Lapurdi). Herriko etxe agentzietan izandako tindaketekin lotuta atxilotu dituzte. Baionako prokuradore Jerome Bourrierek BERRIAri baieztatu dio andeatzeak egitea eta mehatxu egin izana leporatzen dietela lau atxilotuei. Paueko (Okzitania) polizia etxean dauzkate, atxiloaldian. Atxilotuetako bat Senpereko hautetsia da, Senpere Bai talde abertzaleak jakinarazi duenez.
Atxiloketak salatzeko elkarretaratzea eginen dute Senpereko herriko etxearen aitzinean, 19:00etan, Utz gazteria bakean lelopean. Sostengua jaso dute lau gazteek: EH Baik, Kontseilu Sozialistak, LABek eta Xuti Gazte dinamikak «berehala» askatzea galdegin dute, eta elkarretaratzean parte hartzeko deia egin. Era berean, Senpere Bai herriko talde abertzaleak atxiloketak gaitzetsi ditu ohar baten bidez. «Frantziako Poliziaren operazio honek Euskal Herriko gazteria kriminalizatzea du helburu, Frantziako Estatuaren betiko norabidea segituz», erran dute.
Halaber, Frantziaren gelditasuna salatu dute etxebizitzaren krisiari dagokionez: «Gure herriak bizi duen higiezinen espekulazio azkarraren kontra Frantziako Estatuak deus egiten ez duen honetan, afera honetan hartutako zentzugabeko neurriak salatzen ditugu. Etxebizitzaren problematika da zinezko oinarrizko arazoa. Etorkizunaz kezkatua agertzen den gazteria aktibo bat kriminalizatzea hobesten du Frantziak, Euskal Herriak etxebizitzaren arloan bizi duen arazoari berehalako erantzun konkretuak atzeman ordez».
Iragan apirilean, ikerketa berarekin lotuta, beste lau gazte atxilotu zituen Frantziako Poliziak Lapurdin. Atxiloturik egon ziren Pauen, eta egunean berean libre utzi zituzten.
