Ertzaintzak 40 urteko gizonezko bat atxilotu du bart goizaldean Barakaldon (Bizkaia), emakumezko bat hiltzen saiatzea egotzita. Andrea eta atxilotutako gizona bikotekide ohiak ziren, eta emakumeari labanaz egin diote eraso. Gurutzetako erietxera eraman dute, zauri ugari zituela eta, larri.
Eusko Jaurlaritzako Segurtasun Sailak jakinarazi duenez, 04:00 baino lehentxeago gertatu da erasoa; ordu horretan, Ertzaintzak abisu bat jaso du, etxebizitza batean gertatutako eraso baten berri emateko. Behin poliziak hara joanda, etxebizitzako eskaileretan topatu dute emakumezko bat, labanaz eginiko zauri ugari zituena eta odol jario handia zuena. Larrialdi zerbitzuek bertan artatu dute, eta Gurutzetako ospitalera eraman dute gero.
Erasotzaileak ihes egin du handik. Ertzaintzak Barakaldon bertan atxilotu du andrearen bikotekide ohia, eta hura hiltzen saiatzea egotzi dio. Datozen orduetan utziko dute Barakaldoko Guardiako Epaitegiaren esku.
