Legutioko (Araba) Zentro Sozialista hustu berri dute Ertzaintzako agenteek. Mugimendu Sozialistako kideek 2019an okupatu zuten hotel bat da: Desjabetuon Hotela. Joan den ostiralean jakin zuten dagoeneko finkatuta zegoela eraikina husteko data, eta asteburutik egitarau zabala prestatu dute hori geldiarazteko asmoarekin. Gaur bertaratu da Ertzaintza, eta istiluak izan dira manifestarien eta agenteen artean. Mugimenduko kideen arabera, Ertzaintza oldartu egin zaie, eta «hogei pertsona inguru» zauritu dituzte. Bi lagun atxilotu dituzte.
Ertzaintzaren dispositiboa Desjabetuon Hotelaren inguruan pic.twitter.com/yLUMkQ2xYw
— Gedar.eus (@GedarLangileKZ) June 28, 2022
Ertzaintzako agenteek eraikinaren bi aldeak itxi dituzte lehenik, eta ondoren hotelaren atzealdetik sartzen saiatu dira. Une horretan iritsi dira eraikinaren legezko jabeak eta sarrailagileak. Orduan hasi dira tentsio uneak, eta Gedar hedabideak sareetan zabaldutako bideoetan ikusten denez, manifestarien aurka kargatu dute Ertzaintzako agenteek. Nabarmendu dutenez, beste oldarraldi bat ere egon da horren ondoren. «Hogei inguru dira zaurituak», salatu dute.
Ertzaintzak hainbat gazte zauritu ditu Legutioko Desjabetuon Hotelaren desalojoan pic.twitter.com/KOH9vUPvQC
— Gedar.eus (@GedarLangileKZ) June 28, 2022