Gaur goizean Ertzaintzak Edurne eta haren seme Xabi etxegabetu ditu, Galdakaon (Bizkaia). Familiak adierazi duenaren arabera, ez zuten zorrik bankuarekin, ezta beste inorekin ere, eta, gainera, ez dute bizitzeko beste etxerik. Hala ere, Ertzaintza familia etxegabetzera joan da, baina etxeko atariaren aurrean hainbat bizilagun aurkitu ditu eserita, poliziei atera iristea eragozteko.
Binke tokiko hedabideak Edurnerekin hitz egin zuen atzo, eta etxegabetzearen arrazoiak azaldu zituen. Etxea Edurneren senar ohiaren izenean dago, eta, semeak 18 urte bete berri dituenez, etxetik ateratzera derrigortu ditu senar ohiak. Legearen arabera, etxearen jabea derrigortuta dago etxebizitza semearentzat mantentzera, nahiz eta gurasoak bananduta egon. Semeak, baina, 18 urte egin ditu, eta, adinez nagusia denez, familia etxetik botatzeko aukera du jabeak. «Semea etxean geratzeko saiakerak egin ditudan arren, etxetik botako gaituzte», adierazi zion atzo Edurnek Binke-ri.
