COVID-19aren pandemiaren bilakaerara txertoak nola egokitu eztabaidagai izan zuten atzo mundu osoko sendagaien agentzia nagusiek. Batzar zientifikoan izan ziren nazioartean sendagaiak erregulatzeaz arduratzen den ICMRA erakundea, EMA Sendagaien Europako Agentzia, FDA elikagaien eta botiken segurtasuna aztertzen duen AEBetako agentzia eta OME Osasunaren Mundu Erakundea. Txertoak birusaren aldaera berrietara hobeto egokitzeko neurriak adosteko batzartu ziren. Ondorioztatu zutenez, COVID-19aren aurkako txertoek babesa ematen dute oraindik ere gaixotasun larriei, ospitaleratzeari eta heriotzari aurre egiteko, eta haiek erabiltzen jarraitzearen alde egin zuten. Nolanahi ere, onartu zuten birusaren bilakaerak aurrera egin ahala «apaldu» egiten dela txertoen eraginkortasuna eta babesa.
Oraintxe, omikron aldaeraren BA.4 eta BA.5 azpialdaerak nagusi dira munduan, baina horiek ordezkatzeko gai diren aldaera berriak sor daitezkeela ohartarazi dute. Hori kontuan hartuta, eta gaur egun dauden behin-behineko ikerketa datuen arabera, sendagaien agentziek adierazi dute omikronaren aldaera batera egokitutako RNA txertoek immunitatea eta babesa handitu eta hedatu dezaketela errefortzu gisa erabiltzen badira. Gainera, adierazi dute txertoak bi aldaeretara egokituta baldin badaude –betiere horietako bat omikron bada– immunitatea handitzeko gaitasuna izan dezaketela. Gisa horretako txertoak (balio bikoak) errefortzu gisa erabiltzearen alde agertu dira nazioarteko adituak.
Kutsatzeen gorakadarekin kezkatuta
Koronabirus kasuak ugaritu direla-eta, maskara leku txikietan erabiltzeko gomendioa eman du gaur Carolina Darias Espainiako Gobernuko Osasun ministroak. Kutsatzeen gorakada ikusita, «zuhur» jokatzeko eskatu du Dariasek, eta maskara toki itxietan janztea aholkatu. Gaur-gaurkoz, sistema immune ahula dutenentzat eta haurdun dauden emakumeentzat da gomendagarria maskara janztea, espazio itxietan eta jendea pilatzen den tokietan.
