Dylan Groenewegen herbeheretarrak irabazi du (BikeExchange Jayco) Frantziako Tourraren hirugarren etapa. Danimarkan jokatu da gaurkoa ere, eta Sondeborgen amaitu da. Groenewegen esprintean nagusitu da, Wout van Aert flandiarrari gailenduta (Jumbo-Visma). Azken horrek maillot horiari eutsi dio. Hirugarren Jasper Phililpsen izan da (Alpecin Deceuninck).
Gaurkoa izan da Danimarkako azken etapa. 182 kilometro izan ditu. Eguneko protagonista Magnus Cort Nielsen izan da. Bakarrik egin du ihes, mendiko sailkapenerako puntuak batu nahian, eta lortu du helburua, eguneko hiru mendatetan (laugarren mailakoak) izan baita lehena.
Bihar atseden hartuko du tropelak, eta Danimarkatik Frantziara bidaiatuko du. Asteartean 171 kilometroko etapa korrituko dute, Dunkerke eta Calais artean.
