Albistea entzun

Berdintasuna

64 emakumek Hondarribiko alardean parte hartzea eskatu diete udalari eta Alarde fundazioari

Guztion Alardea taldeak jakinarazi duenez, astelehenean egin zuten eskaera: orain arte emakumeak soldadu gisa onartu ez dituzten konpainietan desfilatu nahi dute.

Hondarribiko alardea, artxiboko irudi batean.
Hondarribiko alardea, artxiboko irudi batean. Juan Herrero / EFE Tamaina handiagoan ikusi

Berria -

2022ko uztailak 6 16:09

«Herriko emakumeak gara, gatazkaren inguruan bizipen eta sentsibilitate ezberdinak ditugunak. Alardea maite dugu, eta gizonek duten eskubide berarekin parte hartu nahi dugu gure Alardean». Hondarribiko (Gipuzkoa) 64 emakumek alardean parte hartu nahi dutela adierazi diete udalari eta Alarde fundazioari. Guztion Alardea taldeak eman du urrats horren berri: 2019an sortu zuten herriko gazte batzuek, 1990eko hamarkadan piztutako gatazka bideratzeko eskatzeko; andreak soldadu gisa onartzen ez dituen desfilearen ingurukoak dira, baina emakumeek berdintasunez parte hartzea aldarrikatu dute hasieratik. Zehaztu dutenez, astelehenean egin zuten eskaera ofizialki, izen-abizenez sinatuta.

Kopurua «sinbolikoa» dela adierazi du Guztion Alardeak: «Badakigu, noski, askoz gehiago garela Alardean parte hartu nahi dugun emakumeak, eta are gehiago emakumearen parte hartzearen alde gaudenak». Hala, eskaerara batzera eta haiekin harremanetan jartzera deitu dituzte herriko andrazkoak. «Alardea bat eta bakarra da, hondarribiar guztion ondarea, eta edonork beharko luke bertan nahi duen moduan parte hartzeko aukera izan. Hori errealitate bat ez den bitartean, ez dago normaltasunik, ez bizikidetzarik, eta are gutxiago berdintasunik».

Pandemiaren ondorioz, azken bi urteetan ez da alarderik izan Hondarribian —Irunen joan den ostegunean egin zituzten bi desfileak—. Etenaren ondoren eman dute pausoa emakumeek, eta urrats garrantzitsua da: azken 25 urteetan, soldadu gisa desfilatu nahi izan duten andreak Jaizkibel konpainia parekidean baino ezin izan dira atera, baina 64 emakumeok adierazi dute gainerako konpainietan sartu nahi dutela, hau da, orain arte andrazkoen parte hartzea baztertu dutenetan.

Hori dela eta, bi eragileri egin diete eskaera: Alarde fundazioari, desfilearen antolatzailea den aldetik, eta Hondarribiko Udalari, «alardea aurrera eramateko baimena ematen» duen aldetik: «Hondarribiar guztion ordezkari den udalari gogorarazi nahi diogu herritar ororen eskubideak bermatzeko erantzukizuna eta konpromisoa duela». Hedabideei igorritako oharrean, emakumeen parte hartzearen aurka daudenei ere mintzatu zaizkie: «Bakoitzaren parte hartzeko eskubideak ez du zapaltzen parte hartu nahi ez duenaren eskubidea».

Mende laurdeneko gatazka

Euskal Herrian emakumeen eskubideekin eta berdintasunarekin lotutako gatazkarik esanguratsuenetako bat da Irungo eta Hondarribiko alardeen ingurukoa. 1996ko udan lehertu zen auzia, Irunen lehenik eta Hondarribian ondoren: ordura arte, emakumeek kantinera gisa baino ezin zuten desfileotan parte hartu, eta aurreko urteetan soldadu ere ateratzeko nahia adierazia zuten andre batzuek; antolatzaileen ukoaren aurrean, desfileen egunean bertan konpainietan sartzen saiatu ziren, baina kolpeka atera zituzten.

Mende laurdenean ez da gatazka bideratzerik lortu. Irunen bi alarde egiten dira ekainaren 30ean: bat, parekidea, eta bestea, baztertzailea. Hondarribian, berriz, alarde bakarra egiten da irailaren 8an, emakumezko soldadurik gabe, eta Jaizkibel konpainia parekideak bereiz desfilatzen du. Hain justu, aurten 25 urte beteko ditu Jaizkibelek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ertzaintzaren Irungo komisaria. ©GORKA ESTRADA / EFE

22 urteko gizon bat atxilotu dute Irunen, sexu eraso bat egiteagatik

Iñaut Matauko Rada

Goizeko ordu txikitan jazo da, herriko aparkaleku batean. Ertzaintzak sexu eraso bat egitea egotzi dio 22 urteko gizonari.

Mauleko mainfestazioa, gaur. ©Guillaume Fauvea

Etxebizitza espekulazioaren aurka mobilizatu dira Maulen

Oihana Teyseyre Koskarat

Etxe agentzietan itzuli bat osatuz egin dute protesta, XEKK Xiberuko Espekulazioaren Kontrako Kolektiboak antolatuta.

Donostiako erdialdeko kaleetan ibili dira manifestariak. ©IDOIA ZABALETA / FOKU

Zezenketen aurka mobilizatu dira Donostian

Iñaut Matauko Rada

Gipuzkoako Plataforma Antitaurinoak deituta, ehunka pertsonek Aste Nagusian Donostian egingo diren zezenketak gaitzetsi dituzte.

Manifestazioa, gaur, Donostian. ©Itaia Donostia.

Ziztada bidezko erasoak salatu, eta indarkeria matxistaren aurka antolatzera deitu dute

Berria

Itaiak manifestazio bat egin du Donostian, 'Ziztadarik ez. Erasoen aurrean babesa antolatu' lelopean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...