Urte amaierarako atzeraldi hotsak gero eta ozenagoak diren arren, aurtengo lehen sei hilabeteak oso oparoak izan ziren Araba, Bizkai eta Gipuzkoako industriarentzat. Eustaten datuen arabera, eta iazko tarte berdinarekin alderatuta, industria ekoizpenak %7,9 egin zuen gora. Joera, gainera, hoberakoa izan da, ekainean bakarrik iaz baino %10,1 ekoitzi zelako, eta datu hori maiatzekoa baino puntu erdi hobea izan zen.
Sektore handi gehienek iazko ekaineko jarduna hobetu dute. Energiarenak —petrolioaren fintzea hor sartuta dago— %24,5eko gorakada izan du, eta ekipamendu ondasunenak, %17,5ekoa. Azken horretan sartzen dira, besteak beste, autogintza, trengintza, ontzigintza eta sektore aeronautikoa. Oro har, arlo guztiek izan dute iaz baino ekain hobea, batek izan ezik: epe luzeko kontsumo ondasunak. Altzarigintza eta etxetresnak batzen dituen sektorea da, eta horien ekoizpenak %7,6 egin zuen behera.
Lurraldekako analisia eginda, alde handia dago batetik bestera. Gipuzkoaren bilakaera %6,9koa izan da, Bizkaikoa %11,4koa, eta Arabakoa %13,9koa. Datu horiek aztertzean, bi aldagai izan behar dira kontuan: batetik, krisi betean ere Gipuzkoako industriak emaitza hobeak izan dituelako eta bilakaera zaila zela, eta, bestetik, iaz ekainean Tubacex greba betean zegoela eta Mercedesek eten luzeak egin zituela, txipen gabeziarengatik. Bi kasu horiek azalduko lukete, besteak beste, Araban izandako igoera handia.
