Albistea entzun

Energia krisia

Tenperatura mugak «malgutu» ahal izango dira, langileak babesteko

Madrilek zehaztu du «ariketa fisiko handiko» jardueretan arinago ezarriko dutela dekretua; jatetxeetan, adibidez. Eraikinen kaleko argiak eta erakusleihoetakoak nahitaez itzali beharko dira.

Gimnasioetan aire girotua ezingo da 25 gradutik behera jarri.
Gimnasioetan aire girotua ezingo da 25 gradutik behera jarri. Gorka Rubio / Foku Tamaina handiagoan ikusi

Jokin Sagarzazu -

2022ko abuztuak 5

Derrigorrezkoa, bai, baina neurrian. Eta, betiere, beharginen osasuna kontuan hartuz. Espainiako Gobernuak energia aurrezteko ezarri dituen neurriek zenbait sektoretan eragin dituzten kexak apaltzeko eta dekretuari buruz egon diren gaizki-ulertu batzuk argitzeko, Teresa Ribera Trantsizio Ekologikorako ministroak argitu du «malguak» izango direla horien aplikazioan. Gogoratu duenez, kontzientziazioa da neurrion helburu nagusia, baina nahitaez bete behar direla argi utzita. Hala ere, zigorrei buruz ez du hitz egin nahi izan, momentuz.

Aste honetan onartutako neurri sorta lehen urratsa da Europako Batasunarekin konprometitutako energia kontsumoaren %7ko jaitsiera lortzeko. Irailerako neurri gehiago iragarri ditu, eta «gogorragoak» agian, helburu horretara iristeko zailtasunak baleude edota energien eta bereziki gasaren hornikuntzan arazoak handituko balira.

Neurrietako batzuk asteartean sartuko dira indarrean, eta 2023ko azarora arte iraungo dute. Hurrengo egunetan, adibidez, kanpoan bero dagoenean, erabilera publikoko eraikinetako gutxieneko tenperatura 27 gradukoa izango da —neguan 19 gradukoa, gehienez—. Hala ere, zenbait establezimendutan aire girotua jarri ahal izango dute dekretuan ezarritako tenperatura baino tenperatura freskoagoan, Riberak zehaztu duenez, «25 graduren bueltan».

Ministroak esandakoa ez da berria, baina eztabaida iturri bihurtu da. Dekretuan, aipatzen da laneko osasun araudia errespetatu behar dela —orain arte bezala—, eta araudiak dio bulegoko lanak egiten diren lantokietan gehienez 27 gradura igo daitekeela tenperatura, baina «lan arinak» egiten diren lekuetan 25ekoa jarri behar dela gutxienekoa.

Eta zer dira lan arinak? Riberak ez du zerrenda zehatzik eman. Adibide bat jarri du: «Dantzaleku bateko behargin bati eta liburu denda bati ezin zaie tenperatura bera eskatu lan egiteko». Oro har, «ariketa fisiko handiko» jarduerak aipatu ditu, eta horiek, besteak beste, jatetxeak, sukaldeak, dantzalekuak eta gimnasioak izan daitezkeela.

Beste jarduera batzuei dagokienez —hala nola saltokietan, garraioko eraikin publikoetan, kulturguneetan...—, Riberak esan du «justifikatu» egin beharko luketela dekretuak ezarritako tenperatura muga ez aplikatzeko arrazoia, betetzen ez dutenean: dena den, horietan ere «malgu» jokatu ahal izango dute, beharginak kontuak hartuz, haien lan osasun eskubideak «babesteko».

Justifikaziorik ez du izango eraikinetako kaleko argiak gauean itzaltzeko obligazioak. Itzali egin beharko dute jarduera bukatzean edo beranduenik 22:00etan dendetako erakusleihoak eta eraikin publikoetako —museoetako, antzokietako, monumentuetako...— kanpoko argiak badira.

Jaurlaritzaren babesa

Eusko Jaurlaritzak bere egin ditu Madrilek ezarritako neurriak, baina horiek erkidegoekin adostu ez izana kritikatu du Iñigo Urkullu lehendakariak. Gauza bera egin zuen atzo Arantxa Tapia Ekonomiaren Garapenerako sailburuak. Ukatu egin zuen berak esan izana dekretua ez zutela beteko. Jaurlaritzari dagokio neurriak betetzen diren ala ez kontrolatzea, eta horri buruz ez du argibiderik eman, baina araua malgu aplikatu beharra azpimarratu du. Tapiarentzat ere funtsezkoa da «sektore bakoitzaren berezitasunak» kontuan hartzea.

Arabako, Bizkaiko eta Gipuzkoako Euskomer Merkataritza Federazioak —18.000 saltoki inguru ordezkatzen ditu—, berriz, erakundeei eskatu die arau berriak «malgutasunez» indarrean jartzeko, eta «denbora epe bat» emateko, negozio bakoitzaren ezaugarriak kontuan harturik. Agintariei euren mezuetan «argiak» izateko eskatu die, «neurriak behar bezala hartu ahal izateko». Energia aurrezteko egitasmoekin bat egiten dutela azpimarratu du merkatarien elkarteak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Elon Musken adierazpenak eta hark abiatutako egitasmoak polemika iturri izaten dira maiz ©ALEXANDER BECHER / EFE

Zientzia fikziozko kapitalismoa

Jokin Sagarzazu

Forbes zerrendaren arabera, munduko pertsonarik aberatsena da Elon Musk. Auto elektrikoen Tesla konpainia da haren enpresa nagusia, baina, horregatik baino gehiago, ideiak saltzeagatik egin da famatu. Esan ohi da kapitalismoak jauzi berri bat egin duela Muskekin.

Aire egokitua ezingo da jaitsi 27 gradutik behera. ©JAGOBA MANTEROLA / FOKU

Energia aurrezteko neurriak indarrean sartu dira Hegoaldean

Berria

Gaur sartu dira indarrean energia aurrezteko Espainiako Gobernuaren neurriak Hego Euskal Herrian.

Elgoibarren istripua izan zuen kamioia errepidetik atera zuen ibilgailuan. Gainean, A-8 autobidea ikus daiteke. ©J. E. / EFE

Bi langile hil dira lan istripuz Errenterian eta Elgoibarren

Imanol Magro Eizmendi

Eraikuntzako langile bat eta garraiolari bat dira. Garraiolariaren albokoa larri zauritua eraman dute ospitalera

Elon Musken adierazpenak eta hark abiatutako egitasmoak polemika iturri izaten dira maiz. ©ALEXANDER BECHER / EFE

Zientzia fikziozko kapitalismoa

Jokin Sagarzazu

Forbes zerrendaren arabera, munduko pertsonarik aberatsena da Elon Musk. Auto elektrikoen Tesla konpainia da haren enpresa nagusia, baina, horregatik baino gehiago, ideiak saltzeagatik egin da famatu. Esan ohi da kapitalismoak jauzi berri bat egin duela Muskekin.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.