Kalean dira berriz ere. Iruñeko Mutilzarra peñako kideen eskeei men eginda, Poliziak bost pertsona atxilotu zituen atzo Iruñean, sanferminetan izandako istilu batzuen harira. Gaur-gaurkoz, ordea, aske utzi dituzte bost arrastatuak. Edonola ere, auzia ez da bukatua: deklaratzera joan beharko dute epailearen aurrera.
Zehazki, festen hondarrean, uztailaren 14ko arratsean Iruñeko zezen plazan ustez izandako eraso batekin lotua da Poliziaren operazioa; gorroto delituak egitea leporatzen diete –horietako bati, lesioak eragitea ere bai–. Mutilzarrako kideek salatu dute plazan ziren hainbat herritarrek eraso egin zietela peña horretako kideei, «baita mehatxatu ere».
Mutilzarrako kideek ohar bat argitaratu zuten egun hartako gertakarien gaineko beren bertsioa azaltzeko: haien arabera, zezenketa bukatu, eta harmailatik hondarrera jaitsi ziren peñako zenbait kide, «Nafarroako bandera handi bat hartuta». Izan ere, haien peñaren oihalaren atzeko partean Nafarroako armarria daukate margoturik. Diotenez, plazan ziren hainbat txistuka hasi zitzaizkien orduantxe, «gorroto eta arbuio keinu gisara». Eta ez hori bakarrik: peñakoek salatu dute objektuak bota zizkietela, eta «irainak eta bultzadak» izan zirela, baita «heriotza mehatxuak ere». Gainera, Mutilzarrak peñak zehaztapena egin du txistuka ari ziren herritar horien ezaugarrien inguruan: «Muturreko ezker abertzalearen inguruko pertsonak ziren».
Ia hilabete da Iruñeko sanferminak bukatu zirela. Geroztik, apenas zabaldu den Mutilzarra peñak salatutako istiluei buruzko irudirik. Sare sozialetan plazaratutako bideoetan, ez da ikusten objektu jaurtiketarik, ez bestelako erasorik ere. Dena dela, bada Mutilzarra peñakoek zeramaten pankarta ikusterik: oihalean, besteak beste, 2020-2030 agendaren logotipoa ageri da, ezabaturik, bai eta irudi erlijiosoak eta Iruñeko udaletxearen marrazkia ere, Espainiako bandera han dela.
