Etxebizitza espekulazioaren aurka mobilizatu dira Maulen

Etxe agentzien espekulazioaren aurka mobilizatu dira gaur Maulen dozenaka lagun. Euskal Herria ez da salgai leloa eraman dute pankartan manifestariek etxebizitzaren espekulazioa salatzeko. Maulen diren etxe agentzien inguruan itzuli bat eginez osatu dute manifestazioaren ibilbidea, plazatik hasita.

XEKK Xiberuko Espekulazioaren Kontrako Kolektiboak antolatu du manifestazioa. Ibilbidean, kolektiboko kideek hartu dute hitza, azaltzeko etxebizitzaren arazoa barnealdera ere hedatu dela. «Zuberoa ez bada oraindik ere kostaldeko etxebizitzen prezioetara heltzen, ez dezagun uste horrelako prezioak ez zaizkigula hona heltzen ahal. Sosaren musika eztia hemen ere gure beharrien kilikatzen hasi da», salatu du Serge Agerre kideak. Gehitu du laborantza lurrak eraikigarri gisa saltzen direla ere batzuetan. «Etxebizitzaren prezioek eta lansariek ez dute beren bidea hartu», trenkatu du.

Besteak beste, L'immobilier Souletin agentziaren aitzinean gelditu dira. «Ez dugu onartzen Zuberoa urtean zehar bigarren etxebizitza hutsez betea izanen den lurraldea izatea», erran du XEKK kolektiboko kide François Plagnardek. Ildo beretik mintzatu da Claudine Arantzet. «Gazte anitzendako ez da aise leku baten atzematea, eta erretreta ttipiak dituzten zaharrendako ere ez. Alta, ez dute jauregi bat xerkatzen, justu etxe edo apartamentu ttipi bat, lasaiki bizitzeko». Halaber, salatu du etxe agentziek eta bankuek erosleen edo bizitegi bat alokatu nahi dutenen hautatzeko sistemak jende xumea bazter uzten duela. «Jabeek dosier hoberena hautatzen dute orain. Baina nora joanen dira beste jendeak?».

Mauleko herriko etxe aitzinean bildu dira manifestariak, finitzeko. «Etxe hutsik ez dugu nahi. Teilatu bat denentzat!», aldarri eginez amaitu dute mobilizazioa.

Lapurdiko kostaldean ere agerikoa da aspalditik etxebizitzen gaineko espekulazioa. Iazko azaroan 8.000 lagun mobilizatu ziren Baionan, 32 eragilek babestuta, etxebizitza eskubide bat dela aldarrikatzeko. Gisa bereko «manifestazio masiboa» eginen dute berriz heldu den urteko apirilean, Herrian Bizi plataformak deiturik.