Multikiroleko euskal kirolariek —triatloia, duatloia eta akuatloia— Europako Txapelketan Euskal Herriko koloreak janzteko eskatu dute gaur. Izan ere, Gu ere bai plataformak adierazi duenaren arabera, eliteko kirolariak eta amateurrak Espainiako edo Frantziako koloreekin aritzera behartuta daude. Hori dela eta, plataformak Espainiako Triatloi Federazioari galdetu dio ea zer gertatuko litzatekeen Euskal Herriko koloreekin egingo balute txapelketa, eta erantzun dute hori egiten duena txapelketatik kaleratua izango dela.
Kirolariek diote «onartezina eta umiliagarria» dela Espainiako edo Frantziako koloreekin aritzera behartzea, eta gehitu dute Euskal Herriak bere talde eta kolore propioekin lehiatu beharko lukeela. Hala ere, kirolariek esan dute bakoitzaren klubaren arroparekin edo nahi dutenarekin lehiatzearekin konformatzen direla.
Eusko Jaurlaritzari, Bizkaiko Foru Aldundiari, Bilboko Udalari eta talde politikoei inplikatzeko eskatu diete, egoerari irtenbidea topatzeko.
