PPk Navarra Suma koalizio eskuindarra hautsi du, koaliziotik alde egiteko erabakia hartu baitu. UPN, PP eta Ciudadanos alderdiek osatzen zuten koalizioa, eta Javier Esparza UPNko presidenteak gaitzetsi egin du PPk koalizioa uzteko modua. Esparzaren ustez, PPk «alde bakarrez» hartu du uzteko erabakia.
Izan ere, UPNk prentsan irakurrita jakin du PPk koalizioa uzteko asmoa duela: ABC egunkariak elkarrizketa egin zion Miguel Tellado PPko antolaketa presidenteordeari, eta, hark esan zuenez, datozen foru eta udal hauteskundeetan haien siglekin aurkeztuko dira. Enrique Maia Iruñeko alkateak Esparzarenaren antzeko iritzia du: «PPk erabaki bat hartu du, eta esan du ez duela nahi Navarra Suma koalizioak jarraitzea. Haiek dira hori adierazi dutenak», esan du.
Ciudadanoseko Iruñeko zinegotziak, Fernando Sesmak, esan du Nafarroarentzako onena «koalizioari eustea» izango litzatekeela: «Navarra Suma arrakastatsua izan dela uste dugu, Nafarroako zentro eskuina batzeko, eta oso ondo funtzionatu du».