Palestina
Israelgo armadak indarrez itxi ditu Palestinako GKEen egoitzak Zisjordanian
Joan den urtean, Israelek talde terroristatzat jo zituen sei erakunde; hain zuzen, horien egoitzei egin diete eraso. Soldaduak bortxaz sartu dira, eta hainbat objektu hartu berekin.
Israelek gidatutako beste erasoaldi bat jasan du Palestinak, gaur goizaldean. Zisjordanian kokatuak diren GKEak izan dira jomuga, zehazki. Israelgo armadako soldatuak bortxaz sartu dira sei erakunderen egoitzetan, hainbat objektu lapurtu dituzte, eta itxiarazi egin dituzte eraikinak. Hain zuzen ere, Israelgo Gobernuak iaz azaldu zuen erakunde horiek «talde terroristak» zirela.
Al-Haq GKEak eman du erasoaldiaren berri, Twitterren. «Gaur goizean, Israelen indar armatuek Al-Haq-ek Ramallahn duen bulegoari egin diote eraso. Objektuak hartu dituzte, eta sarrera itxi dute, burdinazko plaka batekin. Agindu militar bat ere utzi dute haren atzean. Erakundea ilegala dela diote», idatzi dute txio batean.
Zabaldutako informazioaren arabera, itxi egin dituzte Bisan Ikerketarako eta Garapenerako Zentroa, Emakume Palestinarren Batzordeen Elkartearen egoitza, Haurren Babeserako Nazioarteko Zentroa, Nekazaritza Lanerako Batzordeen Elkartearena, eta Addameer Giza Eskubideen eta Atxilotuen Babeserako Elkartearena.
Israelek joan den urteko urrian izendatu zituen erakundeok «talde terrorista». Baina ez orduan bakarrik: hain zuzen ere, atzo, Israelgo Gobernuko Defentsa ministro Benny Gantzek berretsi egin zuen izendapena; «terroristak» zirela adierazi zuen berriz ere. Nazioarteko zenbait erakundek eta herrialde batzuek sarritan ukatu dute hori hala dela; Espainiak, Belgikak, Danimarkak eta Frantziak, esaterako. Ordea, Israelek ez du atzera egin.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
