Astelehenean 6,8 graduko lurrikara batek astindu zuen Txinako Sichuan probintzia, eta dagoeneko 65 dira hildakoak. Erreskate taldeak lanean ari dira oraindik epizentroa izan zen tokian. Komunikazioak etenda daude, eta etxeak erortzen ari dira oraindik. 3 gradutik gorako hamar erreplika izan dira lurrikararen ostean.
Astelehen goizaldean izan zen lurrikara, lur azaletik hamasei kilometrora. Hildako 65 pertsonez gain, hamabi desagertuta daude, Global Times egunkariaren arabera. Zaurituak 248 dira.
Suediaren tamainako probintzia bat da Sichuan, eta 84 milioi biztanle ditu. 50.000 pertsonak etxea utzi behar izan dute. Alerta mailarik handienetan bigarrena ezarri dute, eta 6.500 pertsona ari dira parte hartzen erreskateetan.
