Espetxe politika hizpide izan du Beatriz Artolazabal Eusko Jaurlaritzako Berdintasun, Justizia eta Gizarte Politiketako sailburuak gaur goizean, Radio Vitoriari emandako elkarrizketa batean. Euskal presoek gradu aldaketarako eta hurbiltzeko egindako eskaerak hizpide hartuta, Artolazabalek jakinarazi du Jaurlaritzak ukatu egin dituela Arabako, Bizkaiko eta Gipuzkoako espetxeetara hurbiltzeko bost presoren eskaerak, «sustraitzerik» ez dutela argudiatuta.
Baimenak eta hurbiltzeak eskatzen dituena edozein izanda ere, eskaera guztiak «zorroztasun» eta «zuhurtzia» berberarekin aztertzen dituztela adierazi du Artolazabalek, eta bost preso horien kasuan ez dutela egokitzat jo gerturatzea.
Kartzela politikan «bereziki zorrotzak» izan beharra dutela nabarmendu du Artolazabalek. Gradu aldaketei dagokienez, espetxe bakoitzeko tratamendu batzordeak aztertzen ditu eskariak lehenik, azaldu duenez, eta, egokitzat joz gero, Eusko Jaurlaritzak berriz aztertzen ditu. Hortaz, halakoak onartzean «legea betetzen» baino ez direla ari argudiatu du sailburuak.
Historia «oso odoltsua» duten presoak graduz aldatzeak edo hurbiltzeak herritarrei «mina» sorrarazten diela ere esan du Artolazabalek, eta min horrekin bat egiten dutela Eusko Jaurlaritzako kideek ere. Preso horien egoera aztertzea «oso gogorra» dela esan du, horiek egindakoak oroitzea baitakar. Hala ere, horrek ez luke legea betetzea eragotzi behar, Artolazabalen esanetan.
