Angeluko (Lapurdi) BAB 2 merkataritza gunetik hurbil dagoen eremu batean, Eiffage enpresa eraikuntza bat egiten ari da, eta hango lurrean hondakin mordoa ageri den bideo bat zabaldu zuen Hugo Clement Frantziako kazetari ezagunak sare sozialetan. Polemika piztu du, eta Angeluko Herriko Etxeak berehala agindu du obra bertan behera uzteko. Izan ere, Claude Olive auzapezak erran du hondakindegi bat zegoela eremu horretan, eta Euskal Hirigune Elkargoaren gain utzi du ikerketa egiteko ardura. Eiffage enpresak gaur goizean erantzun dio BERRIAri, eta, komunikazio zerbitzuaren arabera, «ez dago arrisku sanitariorik» eremu horretan.
Eiffage enpresak baieztatu du lehen hondakindegi bat zegoela eremu horretan, baina segurtatu du beharrezko azterketak egin direla. Hasteko, haien hitzetan, «ohikoa» da halako obrak gisa horretako eremuetan egitea. «Laborantza lurrak atxiki behar diren heinean, geroz eta gehiago eraiki beharko da aurretik artifizializatuak izan diren eremuetan, Angeluko kasuan bezala». Segurtatu dute, halaber, ikerketaren arabera hondakinak bizigabeak direla, eta bizitegiak leku horretan eraikitzeak ez dakarrela arriskurik.
Bestalde, Eiffagek erran du «ulertzen» dutela Hugo Clement kazetariak zabaldutako irudiek «emozioa» eragin izana. Eta honako hau gehitu du: «Irudi horiek hondakinak bereizi eta kendu aitzin filmatuak izan dira». Hala, zehaztu dute obra eten dutela, Angeluko Herriko Etxearen aginduaren ondorioz, baina «prest» daudela «ahal bezain fite» berriz hasteko.
