Ikasle Abertzaleek grebara deitu dituzte Hegoaldeko bigarren hezkuntzako ikasleak urriaren 27rako. Bilbon, Gasteizen, Iruñean eta Donostian egingo dituzte mobilizazioak. Uste dute Eusko Legebiltzarrean tramitatzen ari den Hezkuntza Legea «elite ekonomikoek bideratutako eta politikari profesionalek gauzatutako» adibidea dela. Segregazioan sakontzen duelakoan daude, eta modu «inposatzaile» batean egindako prozesu bat dela salatu dute. «Aldaketon ondorioz, are sakonagoak izango dira heziketaren desegitea, segregazioa, hezkuntzaren burokratizazioa eta inposizioa», IAren ustez.
Inposatzailea dela adierazi dute. «Politikoki oso ezberdinak omen diren lau alderdi parlamentario nagusiak berehala ados jarri dira aipatu ditugun aldaketak inposatzeko. Hezkuntza komunitatea osatzen duten beste sektore batzuk, berriz, guztiz baztertuta gelditu dira». Sindikatuen jarrera ere kritikatu dute, Hezkuntza Legeari kritikarik egin ez diotelakoan, langile asko «ados ez» egonda ere. «Progresismoaren izenean, argi gelditu da politikariek hezkuntzaren gainean duten interesa komuna dela. Argi gelditu da, era berean, interes horiek proletariotzaren interesei kontrajarriak direla». Horrenbestez, doako eta kalitatezko hezkuntza unibertsala defendatzera deitu dute, «politikarien iruzurretik at, Hezkuntza Legearen eta erreformen aurrean langile klasearen interesen defentsan antolatzeko».
