Egia Osoa egitasmoa aurkeztu dute gaur Iruñeko Katakrak gunean. Egitasmoaren parte dira zenbait elkarte memorialista, abokatuak eta torturatuak izandako pertsonak. Egitasmoaren nondik norakoak aletu dituzte Marilo Gorostiagak, Julia Munarrizek eta Imanol Satrustegik.
Hala, eskatzen dute Iruñeko bi toki «memoria gune» izenda ditzatela: Espainiako Poliziaren komisaria zaharra (gaur egun Espainiako Gobernuaren Ordezkaritza dena) eta Guardia Zibilaren kuartela. Eskaera argudiatzeko, esan dute bi toki horietan, jendea atxilotzeaz gain, herritar ugari torturatu zituztela. Gainera, memoria gune horietako bakoitzean oroimenerako plaka bat jartzea proposatu dute, baita giza eskubideen urraketen oroigarri bat eraikitzea ere.
