Eusko Jaurlaritzako Segurtasun Sailak jakinarazi duenez, gaur goizeko lehen orduan gizon bat hil da Irungo Behobia auzoko aparkalekuan (Gipuzkoa). Zer gertatu den ikertzen ari da Ertzaintza, eta, oraingoz, harrapaketa baten gisara abiatu du ikerketa; litekeena da harrapatu duen ibilgailua kamioi bat izatea. Hildakoa kamioilari bat zela zabaldu den arren hasieran, Segurtasun Sailak jakinarazi du ez daudela horretaz seguru. Goizean zehar lortu dute hildakoa identifikatzea: 42 urteko gizoneko bat zen, eta Frantziako nazionalitatea zuen, Ertzaintzak BERRIAri azaldu dionez; polizien hipotesi nagusia da istripuz harrapatu dutela.
Gizonaren egoeraz ohartarazi duen deia 04:30 aldean jaso dute larrialdi zerbitzuetan. Gasolindegiaren ondoan gizon bat harrapatu dutela azaldu dute, eta oso larri zegoela. Larrialdi zerbitzuak iritsi direnean bizirik zen oraindik, baina jasandako zaurien ondorioz hil da. Harrapatu duen ibilgailua ez zegoen han. Ertzaintza lanean da zer ibilgailuk harrapatu duen jakiteko.
