Bazterrean utzi da sarri dolu perinatalaren arta egokia, errealitate «ikusezina» izan baita. Haurdunaldian edo erditzearen osteko asteetan haurrak galtzen dituzten familiak, ordea, asko dira; zenbait estimazioren arabera, haurdunaldien %25etan hiltzen da haur jaioberria edo jaiotzeko dagoena. Sendi horiei ematen zaien arta hobetze aldera, legez besteko proposamen bat onetsi dute gaur Eusko Legebiltzarrean, eta Osakidetzari eskatu diote indartzeko egoera horietarako protokoloak. EAJk, EH Bilduk, Elkarrekin Podemos-IUk eta PSE-EEk batera hitzartutako testua da.
Talde politikoek adierazi dute osasun profesionalen ardura dela familiei dolu prozesu horretan laguntzea, eta «ondo trebatuta» egon behar dutela horretarako. Osakidetzak jarri ditu igaro urteotan dolu perinatala aintzat hartze aldera propio pentsatutako egitasmoak, baina motz geratu dira; ez dira hedatu osasun sistema osoan, eta, horregatik, arreta egokia jaso gabe geratu dira sendi ugari. Osasun sisteman «sentsibilizazioan» aurrera egite aldera propio halakoak artatzeko talde eta programa terapeutiko iraunkorrak eratzea aztertu behar dela adierazi dute gaur onartu duten testuan.
Osakidetzari eskatu diote halako egoeretarako protokolo bateratua edukitzeko osasun sistema guztian, eta arta osoa bilatzeko horren bidez; horrek esan nahi du osasun sistemako arlo ezberdinek koordinatuta jardun beharko dutela. Lehen mailako arretako, ginekologiako eta buruko osasuneko profesionalek elkarren berri izan beharko dute, familia bakoitzaren beharren ahalik eta jarraipen egokiena egiteko.
Espazio egokituak
Proposamenaren barruan eskatu dute, halaber, osasun zentro eta erietxeetako espazioak egokitu ditzatela umeren bat galdu duten familiak artatzeko, eta ahal bada saihestu dadila familia horiek ama-umeen unitateetan artatzea. Denborari dagokionez ere, haien erritmoak errespetatu beharko dira.
Osasun sistemak aukera eman beharko die familiei galdu duten umeari adio esateko; horretarako dituzten aukeren gaineko informazioa eman beharko diete osasun profesionalek, eta arta psikologikoa eskura izan beharko dute beti.
Gaiarekin lotutako sentsibilizazioa hobetze aldera, kanpainak egiteko ere eskatu diote Osakidetzari.
