Oro har, gizonek emakumeek baino presentzia handiagoa dute Arabako, Bizkaiko eta Gipuzkoako lau egunkari nagusietan argitaratu diren edukietan. Osasun gaiez mintzatzen diren artikuluetan, zehazki. Hori ondorioztatu dute Eneko Fernandez Artigasek eta Itxaso Fernandez Astobizak ikerketa batean. Azaldu dute generoari begira «desoreka informatiboa» dagoela. BERRIA da salbuespena: aztertutako egunkarietan, BERRIAn bakarrik dira emakumeak protagonista gizonak baino maizago.
Ikerketa egiteko, 2020ko martxoaren 14tik 2021eko maiatzaren 9ra bitarteko larunbat eta igandeetan argitaratu ziren edukiak aztertu dituzte –alarma egoera garaikoak–. Orotara, 524 zenbaki arakatu dituzte ikertzaileek, 134 hedabide bakoitzeko. Horietan, osasunaren gaineko 598 pieza aurkitu dituzte, gehienak COVID-19arekin zerikusia zutenak.
Aztertutako artikulu horiek egiteko erabilitako iturri gehienak gizonezkoak izan dira hedabide guztietan. BERRIAk egin du banaketarik orekatuena: behatutako piezen iturrien %30 gizonezkoak dira, %27 emakumeak, eta %29 biak. Testuen sinadurari dagokionez, oro har, gizonezkoenak dira nagusi. BERRIAn, aldiz, emakumeak gehiengoa izan ziren artikulu horien egileen artean: %65.
Testuak ez ezik, argazkiak ere aztertu dituzte ikerketan. Orotara, 580 argazki topatu dituzte, horietako 143 BERRIAn. Berriz ere, nabarmena da emakumeen presentzia, irudien %59 emakumezkoenak baitziren.