Albistea entzun

Alderdiak

EAren primarioak berriz egiteko aginduaren aurkako helegiteak aztertuko dituzte

Espainiako Auzitegi Gorenak tramiterako onartu du EAren eskaera, eta alderdiaren primarioak berriz egiteko agindu zuen probintzia auzitegiaren epaia balekoa den ala ez erabakiko du.

Eba Blanco (erdian), azaroko biltzarrean, idazkari nagusi izendatua izan ondoren.
Eba Blanco (erdian), azaroko biltzarrean, idazkari nagusi izendatua izan ondoren. JAVIER ZORRILLA / EFE Tamaina handiagoan ikusi

Xabier Martin -

2022ko abenduak 5

Joan den azaroaren 20an, Eba Blanco hautatu zuen EAko idazkari nagusi gisa ezohiko XIV. Biltzar Nazionalak. Aurretik ere horixe bera egin zuen alderdiaren biltzarrak aurtengo otsailean, baina alderdi barruko sektore kritikoak, Maiorga Ramirez buru dela, auzitara eraman zuen Blanco izendatzeko prozesua, primarioak bermerik gabe egin zirela salatuta. Gasteizko probintzia auzitegiak aintzat hartu zuen kritikoen salaketa, eta primarioak berriz egiteko agindu zuen, Eba Blancoren izendapena ezbaian jarrita.

Bada, orain, Eusko Alkartasunak Espainiako Auzitegi Gorenean jarri dituen bi helegite tramiterako onartu dituzte. Helegite horiek Gasteizko lehen epaiaren aurkakoak dira, primarioak berriz egin behar zirela agindu zuen horren aurka, eta, beraz, Auzitegi Gorenak aztertu egingo du kritikoen aldeko ebazpen hori balekoa den ala ez.

Edonola ere, EAk beste biltzar nazionala egin berri du azaroan, eta, horretan ere, Eba Blanco izendatu dute idazkari nagusi, biltzarkideen botoen %92rekin. Dena den, kritikoek berriro ezbaian jarri dute batzar horren zilegitasuna. Hala, EAren azken Biltzar Nazionalak ez du itxi alderdiaren barruko gatazka, eta kritikoek esan dute berriro auzitara joko dutela.

Zuzendaritzak «oso positibotzat» jo du Gorenaren erabakia; «helegite gehienak baztertu egiten ditu aztertzen hasi gabe», azaldu du alderdiak ohar baten bidez. EAk berriro esplikatu du «barne araudiaren arabera» egin zirela primarioak urte hasieran, otsaileko Biltzar Nazionalaren atarian: «Lurralde bakoitzeko berme kopuru jakin bat aurkeztu behar zuten hautagaiek, eta Maiorga Ramirezek ez zuen aurkeztu».

Eusko Alkartasunak bizi duen auzia gero eta katramilatuagoa dago, eta auzitara etengabe jotzeak erakusten du ez dela barne gatazkaren lokarria berehala askatuko. Alderdi horrek EH Bildu koalizioan jokatzen duen rolarekin lotzen dute arazaoa kritikoek; zuzendaritzak, berriz, «botere kontu bat» dela dio; alegia, gutxiengoan egotea zer den onartzen ez jakitea.

Eba Blanco idazkari nagusiak gogor salatu du «beste aldean alderdia txikitzen ari den sektore bat» dagoela. «Anbizio pertsonalarengatik» ari da sektore kritikoa bere ekinean, Blancoren arabera: «Euskal Herrian denek dakiten moduan, honek ez du zerikusirik ideologiarekin edo politikarekin».

EH Bildun duen rola

EAren ibilbideari erreparatu behar zaio barne gatazkaren testuingurua ulertzeko. EAJren banaketa batetik sortu zen Eusko Alkartasuna, Garaikoetxea lehendakari ohia buru zuela, 1986an. Ibilbide luze baten ostean eta beste banaketa baten (Hamaikabat, 2009) zamaren ostean, Euskal Herria Bildu koalizioko kide bilakatu zen 2012an; aurretik Bildun egon zen.

Ramirez EAko Nafarroako buru ohiak eta egun lau urterako afializioa galdu duen politikariak uste du «koalizioa zenak alderdi bakarraren egiturak» garatu dituela, eta ez du aitortzen EAko zuzendaritzaren zilegitasuna, alderdiaren barruan «demokrazia falta» dagoelako, haren ustez. Baina gatazkaren jantzi politiko hori ukatzen du egungo idazkari nagusi Blancok. «Hau ez da auzi politiko bat EH Bildun dugun enkajearen inguruan, botere kontu bat baizik», esan zuen modu argian azaroko biltzarrean.

Bi aldeen arteko arrakala are gehiago handitu du azken urteetan epaitegiek izan duten esku hartzeak, batik bat sektore kritikoaren ekimenez. Azaroko Biltzar Nazionala ez egiteko eskaera ere egin zioten epaileari, baina kautela neurririk ez zuen aintzat hartu hark, eta Eba Blanco berretsi zuten idazkari nagusi gisa, otsaileko biltzarra epaileen aginduz berriz egin ondoren.

Orain, berriz, gerta daiteke Espainiako Auzitegi Gorenak ebaztea otsaileko biltzarra berriz egiteko agindua ez zela legezkoa izan, eta egoera gero eta nahasgarriagoa bihurtzea. Oraingoz, EAren zuzendaritzak jarritako helegiteak aztertu egingo dituela da jakin berri dena.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Espeleologoak Lezetxikiko sistema karstikoaren barruan aurkitutako tunelaren alboan. ©LEZETXIKIREN LAGUNAK

Adifek eta Gipuzkoako Aldundiak txostenak egin zituzten galeria kaltetuaren inguruan

Xabier Martin

Espainiako Garraio ministro Raquel Sanchezek ziurtatu du Lezetxikiko aztarnategiak ez duela «inolako katerik» izan AHTaren tunela dela eta.

Inma Jurio PSNko parlamentaria, atzo, Nafarroako Parlamentuan. ©IÑIGO URIZ / FOKU

PSNk ontzat eman du Nafarroako torturen eta tratu txarren txostena

Mikel Elkoroberezibar Beloki

Navarra Sumak esan du Poliziari «oso eskertuta» dagoela: «Baina torturatu duena ez da gutarra». PSE-EEk ez zuen PSNren iritzi bera izan duela sei urte; «gatazka baten teoria elikatzen» zuela iritzita arbuiatu zuen txostena.

Torturari buruz «oraindik asko» dagoela ikertzeko nabarmendu dute

Laura Pego eta Jeanette Ruiz Kriminologiaren Euskal Institutuko kideak, iaz landutako txostena eskuetan, Nafarroako Parlamentuan. Atzo eman zuten haren edukiaren berri. ©IÑIGO URIZ / FOKU

Torturari buruz «oraindik asko» dagoela ikertzeko nabarmendu dute Nafarroako Parlamentuan

Joxerra Senar

Kriminologiaren Euskal Institutuak bere txostena aurkeztu du Nafarroako Parlamentuan. Laura Pego ikerlariaren arabera, kasu kopurua «garrantzitsua» da, eta azterlana «amaitu gabe» dago oraindik

Senideek, Azpeitiko alkateak eta abokatuek egindako agerraldia, atzo, Azpeitiko udaletxean (Gipuzkoa). ©JON URBE / FOKU

Pasaiako sarraskian hildakoen senideek auzia gizarteratu nahi dute

Iosu Alberdi

Harreman dinamika bat abiatuko dute martxoaren 28ra bitarte, instituzioek eta eragileek ere auzian eragin dezaten. Epaileak zazpi polizia deitu ditu martxoaren 28an identifikazio saio bat egiteko

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...