Albistea entzun

Autogobernua

Nafarroan, Madrilek ez du oztopatuko 3.627 enplegu publiko egonkortzea

Espainiako Gobernuak ez dio foru legeari errekurtsorik jarriko Auzitegi Konstituzionalean, eta uztailean Nafarroako Parlamentuak onartutako legea «bere osotasunean» sartuko da indarrean

Javier Remirez Nafarroako Gobernuko presidenteorde lehena, parlamentuan
Javier Remirez Nafarroako Gobernuko presidenteorde lehena, parlamentuan Jesus Diges / Efe Tamaina handiagoan ikusi

Joxerra Senar -

2022ko abenduak 5

Nafarroako Gobernuak Espainiako Auzitegi Konstituzionalaren mehatxua saihestu du. Administrazioan gehienez behin-behineko 3.627 enplegu publiko egonkortzeko foru legeko bi artikulurekin ados ez zegoela iritzita, Espainiako Gobernuak auzitegi horretara jo zezakeela ohartarazi zuen. Dena den, eskumen gatazkak konpontzeko Koordinazio Batzordean, bi gobernuek akordioa lortu dute.

Azkenik, Madrilek ez du oztopatuko legea. Javier Remirez Nafarroako Gobernuko lehendakariordea «oso pozik» azaldu da, akordio horrek segurtasun juridikoa emango diolako lanpostuok egonkortzeko prozesuari.

Iazko abenduaren 28an, Espainiako Gorte Nagusietan administrazioetan behin-behinekotasuna %8ra arte murrizteko dekretua onartu zuen. Lege hura lurraldeko errealitatera egokitu eta agindu hari bide emateko asmoz, lehenik foru dekretu bat onartu zuen Nafarroako Gobernuak maiatzaren 23an. Bi egun geroago, 3.588 lanpostu egonkortzeko lan deialdi publiko berezia onartu zuen administrazio nukleoan, Osasunbidean eta Hezkuntzan. Hilabete geroago, uztailaren 1ean, foru legea onartu zuen Parlamentuak: egonkortzeko prozesu hartan sar zitezkeen enpleguen ezaugarriak zabaldu zituen,

Foru lege haren babespean, irailean beste 39 lanpostu gehitu zituen Nafarroako Gobernuak eta gehienez behin-behineko 3.627 lanpostu egonkortzea onartu zuen.

Bi artikulurekin arazoa

Alta, urriaren 7an Madrilgo gobernuak bi aldeen arteko eskumen gatazkak konpontzeko Kooperazio Batzordea bilerara deitu zuen. Ez zegoen konforme lan eskaintza publikoetan zenbat lanpostu publiko izango den zehazten duen lege artikuluarekin (4. artikulua). Halaber, begi txarrez ikusten zuen tramiteak erraztea eta epeak murriztea ahalbidetzen duen foru legearen 6. artikulua.

Gatazka hura konpondu ezean, Konstituzionalera irits zitekeen auzia, eta autogobernuaren adarretako bat mozteko arriskua zegoen: funtzio publikoko lan eskaintza publikoetan postu kopurua ezarri ahal izatea, alegia.

Azkenean ez da halakorik gertatu. Akordioan jasotzen denez, bi aldeek «konpondutzat» ematen dituzte euren arteko desadostasunak, eta gatazka, berriz, amaitutzat jotzen dute. Halaber, Auzitegi Konstituzionalari akordioaren edukiaren berri emango diotela gaineratu dute.

Foru legea, osorik
Nafarroako Gobernuak nabarmendu du foru legea «bere osotasunean» ahalbidetuko duela akordioak. Remirezek bere gobernuaren «defentsa adimentsuaren estrategia» goraipatu du, eta «esker ona» adierazi dio Espainiako Gobernuari «elkarrizketa lehenetsi duelako».

Pedro Sanchezen gobernuak «autogobernuarekiko jarrera ona» duela nabarmendu nahi izan dute sozialista nafarrek. Hala, legealdian tankerako beste hamabi akordio lortu direla azpimarratu dute, eta modu horretan adierazi Konstituzionalera jo aurretik ados jartzeko gai direla.

Alta, beti ez da horrela. Adibidez, Kontratu Publikoen legearen aurka errekurtsoa jarri du Madrilek, eta iaz onartutako legearen lau atal auzitan daude. Halaber, aurten onartutako Aldaketa Klimatikoaren legean bederatzi artikulurekin ez dago ados, eta Konstituzionalera jotzeko prest dago.

Remirezen arabera, orotara 7.000 lanpostutik gora egonkortu daitezke. Izan ere, foru legeak baimendutako 3.627 lanpostuei aurretik bere langileen behin-behinekotasuna murrizteko Nafarroako Gobernua prestatzen ari zen ohiko eta ezohiko lan deialdiak gehitu behar zaizkio.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zamaketariak eta portuko beste langileak Baionako portua blokeatzen, atzo, Tarnosen. ©PATXI BELTZAIZ

Erretreten erreformaren aurkakoek Baionako portua blokeatu dute

Iker Aranburu

Erretreta gibelatzeko proiektuari buruzko eztabaida astelehenean hasiko da Frantziako Asanblean
LABek  elkarretaratzea egin zuen azaroan, Adegiren egoitzaren atarian. ©Jon Urbe / Foku

Lehen bilera Gipuzkoako metalgintzan

Irune Lasa

Sindikatuek langileen erosahalmena bermatzeko adinako soldata igoerak nahi dituzte.

Urteko azken hiruhilekoan 9.000 lanpostu galdu dira Hego Euskal Herrian

Urteko azken hiruhilekoan 9.000 lanpostu galdu dira Hego Euskal Herrian

Jokin Sagarzazu

Bereziki zerbitzuen sektorean nabaritu da: 22.700 langile gutxiago daude. Industriak eta eraikuntzak eutsi egin diote, eta enplegua sortzen jarraitu dute.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...