Albistea entzun

Hedabideak

Hekimenek Jaurlaritzari eskatu dio euskarazko komunikabideei «nabarmen» handitzeko baliabideak

Euskarazko hedabideen elkarteak salatu du Jaurlaritzaren laguntzek ez dutela ematen kostuak betetzeko eta ez dituztela aintzat hartzen prezioen gorakadak. Berretsi du audientzian oinarritutako diru laguntzen sistemak «kalte» egiten diela euskarazko hedabideei.

Hekimenek eta Behategiak iaz aurkeztu zuten urtekaria. /
Hekimenek eta Behategiak iaz aurkeztu zuten urtekaria. / Iñigo Uriz/Foku Tamaina handiagoan ikusi

Julen Aperribai -

2022ko abenduak 22 14:03

Jasotakoa baino «bultzada sendoagoa» behar dute euskarazko komunikabideek erakunde publikoen aldetik, Hekimen euskarazko hedabideen elkarteak ohar bidez adierazi duenez. Eusko Jaurlaritzak euskarazko komunikabideei eragiten dieten bi diru-laguntza deialdiren ebazpenak argitaratu ditu gaur, eta eman berritan egin du ohartarazpena elkarteak.

Komunikazioaren mundua «eraldaketa prozesu sakonean» dagoela gogorarazi du Hekimenek, eta nabarmendu «funtzio sozial garrantzitsua» dutela euskarazko komunikabideek, bai «euskararen normalizazio prozesuan», baina baita «informaziorako eskubidean, iritzi aniztasunaren bermean zein desinformazioaren aurkako borrokan» ere. Funtzio hori izaten segitzeko, baina, beharrezko ikusten du «euskarazko komunikabideen ekosistema egonkortzea» eta errealitate berrira «egokitzea». Horretarako, baina, erakunde publikoen laguntza behar dela gogoratu du.

Hekimenek, ordea, ez ditu bide horretan ikusten Jaurlaritzaren diru laguntzak. Batetik, salatu du 2022-2024 aldirako euskarazko hedabideentzako laguntzak, esleitu eta hiru urtera, oraindik ez direla iristen «kostu estandarren %35 estaltzera», hala adostu bazen ere. Akordio haren helburu nagusia «komunikabideen egonkortasun ekonomikoari laguntzea» zela oroitu du Hekimenek, baina ohartarazi du papera, argindarra eta erregaiak garestitu izanak helburu horretatik «urrunago» eraman dituela. Are, zenbait komunikabidek urtetik urtera diru gutxiago jasotzen dutela ere gaineratu du. Deialdi horretan bada «paradoxa zital» bat, elkartearen arabera: «Egitasmo berriak sortzea edo ekoizpena handitzea berri oso onak badira ere, deialdirako diru funtsa finkoa denez, ekoizpena handitzea edo egitasmo berriak sortzea sektorearen kontra bihurtzen da, sektorearen beraren garapena eragotziz».

Hainbat hedabide, laguntzetatik kanpo

Aurten, bigarrenez, Eusko Jaurlaritzak diru laguntza berezia eman die hedabideei, COVID-19ak eragindako kalteei aurre egiten laguntzeko. Sei milioi euroko diru saila izan da, baina zatirik handiena gaztelerazko hedabide batzuek jaso dute. Hekimenek salatu du ezen, Jaurlaritzak azken deialdian aurrekoan baino komunikabide gehiago lagundu baditu ere, oraindik ere laguntza horietatik kanpo daudela euskarazko komunikabide gehienak. «Horrek ez du zentzurik: pandemiaren eraginak komunikabide guztiek pairatu dituzte, eta denek lan egin dute beren hartzaileei informazio egoki eta zuzena emateko».

Oraingo banaketak, hedabideen audientzietan oinarritutakoak, «kalte» egiten die euskarazko komunikabideei, Hekimenen esanetan, ez dituelako «audientzia potentzialak» bereizten; hots, ez duelako aintzat hartzen euskarazko eta erdarazko hedabideen audientzia potentziala desberdina dela. Horregatik, Hekimenek eta haren parte diren komunikabideek «baliabideak nabarmen handitzeko» eskatu diete erakunde publikoei, hiru helburu lortzeko: euskarazko komunikabideak egonkortzea, berrikuntza prozesuak eta proiektuak garatu ahal izatea, eta proiektu komunikatibo berriak garatzea eta egonkortzea.

Laguntzak

El Correo. 1.783.281,73€

Diario Vasco. 876.160,99€

SER. 643.962,85€

Deia. 547.987,62€

Gara. 309.597,52€

BERRIA. 287.925,70€

Nervion + Gorbea. 278.637,77€

COPE. 201.238,39€

Noticias de Gipuzkoa. 182.662,54€

Onda Cero. 142.414,86€

Diario de Noticias de Alava. 139.318,89€

Eldiario.es. 133.126,94€

Grupo Telebilbao/Teledonostia /Televitoria. 126.934,98€

Onda Vasca. 83.591,33€

Hamaika. 43.343,65€

Herri Irratia. 37.151,70€

Tele7. 34.055,73€

Goiena Telebista. 30.959,75€

Infosare + Hitza.eus/Ataria.eus. 27.863,77€

Radio7. 18.575,85€

Bizkaia Irratia. 15.479,88€

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

EH Bilduko Ikoitz Arrese, artxioko irudi batean. ©Raul Bogajo / Foku

Hezkuntza Akordioarekin «leial» jokatuko duela iragarri du EH Bilduk

Gotzon Hermosilla

Gainerako alderdiei «zorroztasuna» eskatu die asteartean irekiko den eztabaida fasean «lege on bat» erdietsi ahal izateko

Nafarroako Unibersitate Ospitalea, artxiboko irudi batean. ©IÑIGO URIZ / FOKU

Kontuen Ganberak ebatzi duenez, «Osasunbidea ez da betetzen ari pazienteak artatzeko epeak»

Ion Orzaiz - Mikel Elkoroberezibar Beloki

Itxaron zerrendei buruzko txostena argitaratu du Nafarroako Kontuen Ganberak. Ondorioztatu du %29 handitu zirela 2018 eta 2022 bitartean.

Itunpeko sare langileek apirilaren 25ean egin zuten mobilizioa ©ARITZ LOIOLA / FOKU

Zortzi eguneko greba iragarri dute itunpeko hezkuntzako sarean

Iraia Vieira Gil

Arabako, Bizkaiko eta Gipuzkoako Kristau Eskolako eta IZEAko langileak deitu dituzte lanuztera ELA, Steilas, CCOO, LAB eta UGT sindikatuek.

 

Abuztuan izandako beroaldiaren irudi bat, Bilbon. ©JAVIER ZORRILLA / EFE

'El Niño', eta tenperaturak goia jo duen urtea

Iñaki Petxarroman

Munduko Meteorologia Erakundeak uztailean eman zuen hasitzat 'El Niño' fenomenoa. Jatorria Ozeano Barean du, baina eragin ohi duen tenperatura igoerak mundu osoa astindu du, inoizko udarik beroena izan baita. Alabaina, neguan izan ohi du indar handiena, eta uste dute 2024an nabarituko direla horren ondorioak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...