Lortu dute: euskarazko Wikipediak jadanik baditu «Wikipedia guztiek izan beharreko 10.000 artikuluak» sarean. Kalitatea aztertze aldera, Wikipediak berak zerrenda bat du hizkuntza bakoitzaren atarian irakurgai dauden artikuluak «aski» ote diren neurtzeko. Sistemak irizpide nagusi bat du oinarri: zehaztua dago gai bakoitzeko –hala nola teknologia, historia eta artea– zenbat artikulu egon beharko liratekeen argitaratuta. Abenduaren 1ean, euskarazko Wikipediak zerrenda horretako 9.622 zituen sarean plazaratuak, eta argi zuten erronka: 378 gehiago izatea urtea bukatu aurretik. Esan, eta egin.
Wikipedia guztiek izan beharreko 10.000 artikuluen zerrenda hartu dugu aurten gidari. Hizkuntza bakarrak (serbierak) lortu du 10.000 artikuluak izatea. Euskaraz 378 falta zaizkigu. Lortuko al dugu erronka gainditzea hilabete honetan?https://t.co/XzHBiJpAy9pic.twitter.com/r8qpDNP9sv
— Euskarazko Wikipedia (@euwikipedia) December 1, 2022
Erronka bota zuten egunean zehaztu zutenez, orain arte serbierazko Wikipediak baizik ez zuen lortua 10.000 artikuluak edukitzea. Dena dela, ikusgai dago langa horretatik hurbilen dauden hizkuntzen sailkapena. Egunek aitzina egin ahala, apurka, euskarazkoak gora egin du nabarmen. Esaterako, japonierazko Wikipedia aurreratu zuen abenduaren 9an.
Twitter bidez, ia egunero eman dute eginiko urratsen berri.
Aurtengo erronka Wikipedia guztiek izan beharreko 10.000 artikuluak euskaraz egotea da. Momentuz, serbierak baino ez du lortu.
— Euskarazko Wikipedia (@euwikipedia) December 9, 2022
Gaur 254 falta zaizkigu, beraz 10. hizkuntza gara egindako artikuluen sailkapenean. Japoniera gainditu berri dugu!https://t.co/XzHBiJHJMhpic.twitter.com/emf91lCQ7z
Erronka bete dadila erdiesteko argitaratutako azken artikulua taldeen errepresentazio teoriari buruzkoa izan da, matematikari buruzkoa alegia. Halaber, euskarazko Wikipediak aipamen berezia egin dio Joxan Garaialderi. Atariak azpimarratu duenez, azken 27 egunotan 89 artikulu idatzi ditu Garaialdek euskaraz. Guztira, 403.220 artikulu daude euskarazko Wikipedian plazaratuta. 400.000 artikuluren langa urriaren 19an gainditu zuen.
