Elikagai jakin batzuen BEZaren murrizketarekin batera, Hego Euskal Herriko saltokietan beste berrikuntza bat sartu da indarrean. Atzotik, debekatuta dago fruta eta barazkiak plastikozko ontzietan saltzea baldin eta kantitatea 1,5 kilo baino gutxiagokoa bada. Horrekin batera, 400 metro koadrotik gorako txikizkako saltokietan, ontziratu gabeko produktuek %20 okupatu beharko dute gutxienez.
Saltokietan fruta eta barazkientzako ontzien alternatibak erabiltzen ari dira jada. Denda batzuetan, paperezko poltsak edo kotoizko poltsa berrerabilgarri eta biodegradagarriak eskaintzen hasi dira. Beste toki batzuetan, kartoizko kaxetan saltzen hasi dira zenbait fruta, hala nola laranjak eta sagarrak. Erosleek beren ontzi berrerabilgarriak eraman ahalko dituzte fruta eta barazki kopuru txikiak erosteko. Baita, besteak beste, azal oso fina duten eta arin deshidratatzen diren produktuentzat, zurituta eta zatitua saltzen den frutarentzat eta garbitu beharrik gabe jateko prestatuak dauden entsaladentzat ere.
Enbalajea erabiltzen denean –1,5 kilo baino gehiagoko ontzietan–, berriz, etiketetan behar bezala identifikatu behar da zer motatakoa den, eta zein zaborrontzitan bota behar den.
Ipar Euskal Herrian, antzeko neurri bat dago indarrean iaztik. Debekatuta dago 30 fruta eta barazki mota plastikoz biltzea, ontzi handietan (1,5 kilo baino gehiago) eta fruta heldu edo prozesatuentzat izan ezik.
Gaiari buruzko informazio gehiago, erreportaje honetan.
