Poloniako justiziak urtarrilaren 10ean aztertuko ditu Pablo Gonzalez kazetariaren defentsak haren espetxealdia hiru hilabetez luzatzeko aurkeztutako helegiteak. Oihana Goiriena emazteak esan du oraindik ez dutela frogatu Gonzalez Errusiarentzat espiatzen ari zenik, eta susmoetan bakarrik oinarrituta behin-behineko espetxealdia luzatzen ari direla salatu du. Otsailaren 28an atxilotu zuten, Polonian, Ukrainako gerraz informatzeko lanean ari zela.
Goirienak, hala ere, ez du espero urtarrilaren 10ean defentsaren argudioak aintzat hartuko dituztenik. «Tramite» bat izango da, haren ustetan. Atxilotu zutenetik, espetxealdia luzatu diote Gonzalezi, eta hori eteteko eskaerak atzera bota dituzte. Goirienak espero du, ordea, otsailean haren egoera aldatzea: «Urteurrenarekin frogak aurkeztera behartuta sentitzea espero dut. Itxaropena bai, baina zuhurtzia, Poloniako justizia ez baita bat etorri orain arte Europako legediarekin».
Azaroaren 22an ikusi zuen Goirienak senarra, eta 2022. urtearen amaieran jaso zuen haren azken gutuna.
