Energia Berriztagarrien I. Lurralde Plan Sektoriala onartu behar dute, eta horren ondoren eman behar dira berriztagarrien instalazioak eraikitzeko baimenak. Hori aldarrikatu du ELAk ohar baten bidez, eta Eusko Jaurlaritzari eskatu dio plan hori onartu arte itxaroteko baimen gehiago eman baino lehen. Izan ere, azaldu dute plangintza horrek zehaztuko duela instalazio horiek «non eta nola» eraiki ahalko diren. Atzo Jaurlaritzak Arabako Labrazako eta Azazetako parkeek ingurumen inpaktuaren adierazpena jaso dutela iragarri ondoren egin du eskaera sindikatuak; horiez gain Hego Euskal Herriko 33 lekutan dabiltza sortzen energia berriztagarria ekoizteko azpiegiturak.
Berriztagarrien Plan Sektoriala «gizartearen parte hartzearekin eta pertsonen eta ingurugiroaren onurak bilatuko dituzten irizpideak lehenetsiz» egitea ere galdegin du sindikatuak. Hala ere, plan hori onartu bitartean, ELAk adierazi du beharrezkoa dela «gizartearen energia beharrak aztertu eta egin beharreko kontsumo murrizketak zehaztea», eta, horrekin batera, berriztagarriekin sortuko den energia kontuan izanda, energia fosilen ekoizpena murrizteko plangintza ere egitea.
Hala ere, ohartarazi dute helburua ez dela energia fosila berriztagarriekin aldatzea: «Proiektu horiekin planteatzen ari dena energia gehiago ekoiztea da, ez energia fosila berriztagarriekin ordezkatzea».
