Espainiako Kopako final-laurdenetako kanporaketa jokatu zuen atzo Osasunak, Sevillaren kontra; 18 urteren ondoren, finalerdietara iristea lortu dute, 2-1 gailendu ostean. 20.000 zale inguru bildu ziren Sadarren. Asko izango ziren joko zelaiko baloiari begira, baina bazen begiak harmailetara begira izateko arrazoirik. Besteak beste, Nafarroako bandera eta ikurrina dezente atera zituzten zaleek. Harmailetan ere Indar Gorrikoek ikurrina handi bat atera dute. Izan ere, Osasunako hainbat bazkidek zaleei eskatu zieten eraman zitzatela estadiora ikurrinak eta Nafarroako banderak, koroarik gabekoak. Osasunako hiru jokalari ohik ere bat egin zuten eskaerarekin: Jose Maria Lekunberri, Angel Arriaran eta Miguel Angel Marinek, hain zuzen.
Bi aste egin behar da atzera eskaeraren zergatia ulertzeko: urtarrilaren 14an, Osasuna etxean lehiatu zen Mallorcaren aurka. Eneko Compains bazkideak ikurrina eta Nafarroako bandera eraman zituen partidara, eta horiek eskegi harmailetan. Segurtasun langileek banderak kenarazi zizkioten, nahiz eta beranduago horiek berreskuratu zituen. Bere lekukotza eman zuen gero; honela jaso zuen BERRIAk:
Ikusi gehiago:Eneko Compains: «Sadarren banderak kentzeko emandako agindua erabat arbitrarioa da»
Sevillaren gaurko partida hasi aurretik, Compainsek tartea eskaini zion BERRIAri deialdia zergatik egin zuten azaltzeko: «Sumatu genuen Osasunako oinarri sozialean, eta, oro har, nafarren artean haserre bizia piztu zela Mallorcaren aurka[ko partidan] bizitakoarekin». Horiek horrela, Sadarren, gureak! kanpaina sortu zuten Osasunako hainbat bazkidek atzoko partidarako, eta ikur horiek aldarrikatzera deitu, «pairatu zuten debekuari» aurre egiteko. «Aukera ona da, behingoagatik [hilaren 14koa] errepika ez dadin, eta ozen aldarrikatzeko».
Aurrez aurrekoaren hogeigarren minutuan, «taldearen, haren balioen eta zaleen eskubideen alde» txalokatzeko eskatu ere eskatu zuten, eta «jazarriak izan diren eta izaten diren banderak» eramateko. Indar Gorrik bat egin zuen bazkide horiekin: «Gure herrian gure ikurrak. Kopako partidan ekarri zure aldarria Sadarrera».
Tentsio unea
Compainsek azaldutakoaren irudiak badira, zale batek grabatuta. Hona hemen segurtasun langileek Osasunaren eta Mallorcaren arteko partidan bi ikurrak kendu zituzteneko unea:
Año 2023, no 1976 pic.twitter.com/5w2xGLOP4h
— Jose Luis Foncillas (@jlfoncillas) January 15, 2023
Bi bandera horiek ez ezik, GKS Gazte Koordinakunde Sozialistaren pankarta bat ere kenarazi zieten beste zale batzuei, datorren urtarrilaren 28an Iruñean eta Bilbon egingo dituzten manifestazioetara deitzeko erabili zutena. Azken hori izan zen, Osasunako arduradunen arabera, ikur guztiak kendu izanaren eragilea, nahiz eta irizpideak «oso malguak» izan ohi diren estadioan: «Ez zuten horren berri eman». Ondorioz, Espainiako Poliziako koordinatzaileak —hura arduratzen da estadioko segurtasunaz— agindua eman zuen baimenik ez zuten ikur guztiak kentzeko; tartean, ikurrina eta Nafarroako bandera. Klubak berak adierazi zuen ez zetorrela bat segurtasun langileek egindakoarekin, eta «erantzuleak topatzeko eta beharrezkoak diren neurriak hartzeko» konpromisoa erakutsi zuen.
