Hego Euskal Herritik irten edo pasatzen diren ibilbide luzeko autobusak doakoak izango dira gaurtik aurrera. Ibilbide luzeko lurreko garraioaren prezioetan dauden desberdintasunak «berdintzeko» dekretu bat onartu du Espainiako Gobernuak, eta, haren bidez, hemendik aurrera autobusak ere doakoak izango dira.
Izan ere, Renfeko aldiriko zein ibilbide ertaineko bidaiak doakoak dira duela hilabete batzuetatik, eta horiek erabiltzen duten antzerako sistema aplikatuko da autobusetan ere: 20 eta 65 euro bitarteko fidantza bat ordaindu beharko dute bidaiariek—20 eurokoa izango da fidantza 5 euro edo gutxiago balio duten txarteletan, eta 65, berriz, 25 euro edo gehiago balio dutenetan; tarteko prezioak ere egongo dira, txartelen balioaren arabera—, eta apirilera arte 12 bidaia edo gehiago egiten badituzte, bueltatu egingo diete diru hori.
Gutxienez abendura arte indarrean egongo da neurria, eta, fidantzak ordaindu eta bueltatzeko, hiru epetan banatu dute urtea: otsailaren 1etik apirilaren 30era, maiatzaren 1etik abuztuaren 31ra, eta irailaren 1etik abenduaren 31ra. Epe horien hasieran ordaindu beharko da fidantza, eta maiatzetik abendura hamasei bidaia edo gehiago egin badira, amaieran bueltatuko da dirua.
Espainiako Gobernuaren emakidadun enpresetan aplikatuko da neurria, eta enpresa horietan ohiko bideak erabilita erosi ahalko dira txartelak. Bankuko txartela erabilita ordaintzen bada, erabilera epea bukatzean modu automatikoan itzuliko da dirua bidaiariaren kontu korrontera. Eskudiruarekin ordainduz gero, ordea, bidaiariak eskatu beharko du dirua bueltatzeko, epea bukatu eta bi hilabete igaro aurretik.
Baldintzak eta zigorrak
Epe bakoitzean txartel bat soilik erosi ahalko dute bidaiariek, eta beti ibilbide bera egiten duen autobuserako balioko du. Horrez gain, ezin izango da egun berean bidaia bat baino gehiago egin txartel horrekin, eta bidaia bertan behera uztekotan 24 ordu lehenago ezeztatu beharko da. Txartelak, gainera, pertsonalak izango dira, eta pertsona bakar batek baino ezingo du erabili bonu horietako bakoitza. Arau horietakoren bat hiru aldiz apurtuz gero, fidantza kenduko zaio bidaiariari.
Hauek dira Hego Euskal Herrian bonuak baliatu ahal izango diren autobus lineak:
Bizkaia:
Santander - Bilbo - La Manga del Mar Menor
Bilbo - Castro Urdiales
Santander - Bilbo - Bartzelona
Gipuzkoa:
Vigo - Irun - Bartzelona
Santiago - Gijon - Irun - Bartzelona
Irun - Algeciras
Eibar - Iruñea
Madril - Irun
Sevilla - Salamanca - Irun
Irun - Tuy
Nafarroa:
Madril - Iruñea
Eibar - Iruñea
Iruñea - Jaka
