Plaza Hutsa bete dute 350 lagunek baino gehiagok, gaur, Burlatan (Nafarroa). Hiru urteko etenaldiaren ostean egin du Sortuk Plaza Hutsa herrigintzaren topalekua. «Herrigintza aro berri bat hauspotzeko konpromisoa hartu genuen duela urtebete V. kongresuan, eta horri ekiteko abiapuntua marraztu dugu», adierazi du alderdi independentistak ohar baten bidez. Estrategia independentistaren eta herrigintzaren arteko loturetan sakondu dute Plaza Hutsean, Sortuk nabarmendu duenez.
«Euskal Herrian ehun sozial eta parte hartze politiko izugarria dago.Uste dugu herri honetan dugun altxor handienetako bat dela hori, eta horretan sakonduko dugu, Euskal Herriak merezi duen nazio bulkada komunitario erraldoi hori martxan jarri ahal izateko eta egungo erronkei erantzun ahal izateko», adierazi du Lur Albizu Etxetxipia Nafarroako Sortuko koordinatzaileak.
Ikusi gehiago: «Gure erronka da nola lotu nazio proiektua oraingo borrokekin»
Euskal Herriko hainbat herritako denetariko egitasmoetan jarduten duten pertsonak elkartu dira Burlatan, eta sei tailer egin dituzte «Euskal Herriaren eraikuntzan estrategikoak diren eremuetako egoerak, aukerak eta erronkak» aztertzeko.
Hezkuntzari buruzko tailerrean, Finlandiako eta Reggio nell'Emiliako (Italia) hezkuntza sistemak aztertu dituzte. Migrazioari buruzkoan, berriz, haren eta «euskal nazio egitasmoaren» arteko harremanaz aritu dira. «Migrazioen aurrean ezker abertzalearen posizio historikoa aztertu eta gaurko errealitateari atxikiz, gure estrategia eguneratu eta zehazteko lehen urratsa egin dugu», nabarmendu du Sortuk.
Tailer feministan zaintza eskubidea unibertsalizatzeaz hausnartu dute, eta pobreziaren eta bazterketa sozialaren inguruko tailerrean horri aurre egiteko «ezinbestekoak» diren politika publikoez jardun dute. Klima larrialdiari ere heldu diote, «Euskal Herriko begiradatik». Euskarari buruz egin duten hausnarketan, «auzi linguistikoa politizatzearen eta problematizatzearen garrantzia» ondorioztatu dute Burlatan bildutakoek.
Plaza Hutsean «ereindakoa» jarraipena izatekoa da. Sei alor horien inguruko sareak martxan jartzeko asmoa adierazi du Sortuk, «ezker abertzaleko ehunka herrigile iraunkorki saretu eta dagoeneko herrigintzan egiten ari garen lana biderkatzeko asmoz».
