Israelgo armadak 17 urteko adin txikiko bat hil du tiroz gaur goizaldean, Hamza Amjad al Ashqar, Zisjordaniako Nablus hiriaren inguruetan eginiko sarekada batean. Palestinako Osasun Ministerioak jakinarazi duenez, gazteari aurpegian egin diote tiro. Urtea hasi denetik, dagoeneko 42 palestinar hil dituzte militar israeldarrek, tartean bederatzi adin txikiko.
Israelgo armadako iturriek baieztatu dute sarekadak egin dituztela Zisjordaniako hainbat hiritan, bederatzi susmagarri atxilotzeko helburuz. Nablus inguruko sarekadaren harira, adierazi dute hainbat pertsona armatuk harriak eta lehergaiak jaurti dituztela haien aurka. «Soldaduek tiro egin diote tiroka hasi zaien gizon armatu bati. Baieztatu dute inpaktua izan dela».
Zisjordaniako sarekadetan aurrez aurreko armatuak gertatu direla baieztatu du Israelgo armadak; besteak beste, Qalandiako errefuxiatu eremuan. «Han, identifikatu gabeko pertsonek harriak eta lehergaiak jaurti dituzte soldaduen aurka, eta soldaduek neurriak hartu behar izan dituzte protestak sakabanatzeko». Operazio horietan atxilotutakoak segurtasun indarren esku utzi dituzte, ikertzeko.
Astelehenean Zisjordaniako Jeriko hiriaren inguruetan «hainbat terrorista armatu» hil zituela ere jakinarazi du Israelgo armadak, urtarrilean hango jatetxe batean izan zen atentatuaren ustezko egileak atxilotzeko operazioan.
Israelen eta Palestinaren arteko tentsioa eta tirabirak larritzen ari dira azken hilabeteotan, eta nazioartean ere alarma piztu da. Gatazkaren goraldi horren adierazle, urtarrilaren amaieran Israelgo armadak dozena bat palestinar hil zituen tiroz Jeningo errefuxiatu eremu batean eginiko sarekadan. Ondoren, zazpi israeldar hil zituen gizonezko batek Jerusalemetik gertuko sinagoga batean, 2011. urteaz geroztik israeldarren aurka izan den atentaturik odoltsuenean. Benjamin Netanyahu Israelgo lehen ministroak «berehalako neurriak» iragarri zituen, eta, geroztik, tentsioak gora egin du.
