Osasun arloan profesional aritzeko trebatzen ari diren egoiliarren prestakuntzaren eskuduntza Madrili eskatzeko eskabidea eraman du gaur Eusko Legebiltzarrera EH Bilduk, legez besteko proposamen baten bidez. Rebeka Ubera legebiltzarkideak egin du eskearen defentsa. «Osasun espezialitate guztietako formakuntza» autonomia erkidegoan bertan egin ahal izateak berebiziko garrantzia duela esan du: «Bestela, oso mugatuta gaude». Osasun sistema «ahultzen» ari dela gogoratu du, eta ezin dela Madrilen hartzen diren erabakiak «administratzen» bakarrik aritu: «Ezin dugu orain arte bezala jarraitu».
Osoko bilkuran aztertu dute proposamena, baina gainerako talde politikoek ez dute alde egin; beraz, ez da onartu.
EH Bilduk aurkeztu duen testuaren arabera, osasun sistema publikoan «arazo» da egun profesionalen falta. Bertako gizarteak dituen beharretara egokituta jardun ahal izateko, «formakuntza eskuduntzak» ezinbestekoak direla esan dute, eta horregatik horiek eskatzeko urratsa egin behar dela. Gizartearen beharrak eta osasun sistema bera azkar aldatzen ari direla nabarmendu dute, eta «formakuntza eredua» atzean geratzeko arriskua dagoela bestela.
Legez bestekoan jaso dute eskabide hau aurrera eramateko bidea izan daitekeela amiantoaren biktimen konpentsaziorako funtsa lortzeko erabili zen bera.
Babesik ez
Ez du testuak aldekorik lortu. Egungo trebakuntza eredua egokia dela defendatu du PPko ordezkari Luis Gordillo Perezek; EH Bilduk aurkeztu duen proposamenari «sakontasuna» falta zaiola argudiatu du Elkarrekin Podemoseko eledun Jon Hernandezek; legez bestekoa bera «premisa faltsu batean» oinarrituta ondu dela esan du PSE-EEko legebiltzarkide Ekain Ricok; «soseguz eta tentuz» landu beharreko gaia dela nabarmendu EAJren izenean Elena Letek.
«Lankldetzarako» eta «sukalde lanerako» asmoa berrituta amaitu du eztabaida Uberak.
