NATOk esan du Errusiak beste erasoaldi bat hasi duela

Errusia erasoaldi handi bat egitekoa da, zenbait herrialdetako zerbitzu sekretuek azken asteetan ohartarazi dutenez. Ez dute zehaztu non, baina, bitartean, Donbasstik, gerrako fronte nagusitik kanpo ere erasoak gogortu ditu. Joan den ostiralean 70 bat misil jaurti zituen Ukrainaren luze-zabalean, eta, azken 24 orduetan, Kherson hirian zentratu du erasoaldia: hango udalaren arabera, Errusiako indarrek hogei bat misil jaurti dituzte, eta horiek trenbideak, zubiak, enparantzak eta, besteak beste, etxebizitza blokeak jo dituzte.

Horrekin lotuta, Jens Stoltenberg NATO Ipar Atlantikoko Itunaren Erakundeko idazkari nagusiak gaur nabarmendu du Errusiaren «beste erasoaldi baten hasiera» gertatu dela jada, eta Vladimir Putin Errusiako presidentea «milaka eta milaka tropa gehiago» bidaltzen ari dela frontera. Gainera, Ukrainari gerra hegazkinak entregatzeko aukerari atea ireki dio. «Horri buruz hitz egiten ari gara». Aliatuei eskatu die, bide batez, erregaiak eta munizioa eramateko mugimenduak azkartzeko, modu horretan Ukrainak bizitzak «salbatu» ditzan. Mendebaldeko aliantza militarreko estatuetako Defentsa ministroek bilera dute bihar eta etzi, Bruselan. Hizpide izango dute Kievi ematen ari diren laguntza militarra.

Aintzat hartu behar da Kherson izan zela Errusiak inbasioaren ondoren okupatu zuen hiri nagusia, baina azaro hasieran handik erretiratu zela. Herrialdearen hegoaldean dago, Ukraina bitan zatitzen duen ibaiak bustitzen du —Dnieperrek—, eta leku estrategikoa da. Izan ere, handik igaro behar da lurretik heltzeko Errusiak 2014an anexionatutako Krimeako penintsulara; gainera, Errusiaren azken intentzioa baldin bada Ukraina ekialdea eta hegoaldea hartzea eta Donbass eta Transnistria artean lurreko korridore bat egitea —modu horretan Itsaso Beltzerako sarrerarik gabe utziko luke Ukraina—, ezinbestekoa da hura kontrolpean edukitzea.

Ikusi gehiago: Gerra hauspotuz

Khersonen, Dnieper ibaiaren ekialdean, errusiarrak dira nagusi, eta, Kieven arabera, ia egunero eraso egiten diote mendebaldeko aldeari. Areago, Ukrainako indarrek nabarmendu dute azken orduetan ibaia gurutzatu eta mendebaldeko aldera iritsi nahi zuten Errusiaren ontzi batzuk suntsitu dituztela.

Bonbardaketetan pertsona bat hil dute, eta trenbide azpiegituran arazoak eragin ditu; izan ere, gaur, egun osoan, Lvivetik eta Kievetik datozen trenak ezingo dira Khersonera iritsi. Eta trenbideak aipatuta, Errusiako Defentsa Ministerioak iragarri zuen atzo beste herrialde batzuetatik Ukrainako gerra frontera iristekoak diren armak eta munizioak trenez garraiatzeko lerroak blokeatu dituela; nolanahi ere, ez zuen zehaztu non blokeatu dituen.

Gerra fronteak, aurrera

Azken erasoen ondorioz gerra fronteak mendebalderantz bi kilometro aurrera egin dituela kaleratu du, gaur, Errusiako Interfax berri agentziak, Errusiako buruzagi militar baten adierazpenak aipatuz. Hori bai, ez zuen zehaztu frontean non egin duen aurrera. Ukrainaren ekialdeko eta hegoaldeko gerra fronteak 1.300 kilometro ditu ia, eta, Erresuma Batuko Gobernuaren informazio zerbitzuen azken txostenaren arabera, Errusiak, «ziurrenik», gotorleku defentsiboak indartu ditu Zaporizhia eskualdean, hegoaldean.

Ikusi gehiago: Irtenbidea militarra izatearen arriskuez

Bestetik, AEBek berriro eskatu diete beren herritarrei «berehala» alde egin dezatela Errusiatik edo ez daitezela hara joan, atxilotuak izateko arriskuan daudela argudiatuta. Hori ohartarazi dute AEBek Moskun duten enbaxadaren webgunean. Azkeneko bost hilabeteetan bigarren aldiz eskatu die Washingtonek estatubatuarrei Errusiatik alde egiteko. Irailaren 28an ere ohar hori bera plazaratu zuen; hain justu, Errusiak 300.000 erreserbista mobilizatzeko agindu eta gutxira. Errusiak, berriz, garrantzia kendu die ohartarazpen horiei. «Ez da lehen aldia», adierazi du Kremlineko bozeramaile Dmitri Peskovek.