Etxerat elkarteak jakinarazi du Juan Karlos Herrador euskal presoa baldintzapean aske geratu dela. Hamasei urte egin ditu espetxean, eta iazko apirilaren 26tik hirugarren graduan zegoen. 2021eko ekainean bete zituen zigorraren hiru laurdenak.
Herrador 2007an atxilotu zuten, eta salatu zuen torturatu egin zutela atxiloaldian. 2009an ezarri zioten hemeretzi urteko espetxe zigorra. Zigor haren zati handiena Ocaña I espetxean egin du (520 kilometro). Handik Duesora gerturatu zuten 2020ko irailean (225 kilometrora), eta 2021eko abenduan Euskal Herriratu zuten: Basauriko kartzelara.
