Izaskun Lesaka euskal presoa aske geratu dela jakinarazi du Etxerat elkarteak. Izatez, Lesaka iazko ekainean atera zen Reauko kartzelatik (890 kilometrora). Frantzian bizitzeko debekua ezarri zioten, eta, jarraian, Espainiaratu egin zuten. Ordutik, baldintzapean egon da aske, hamar urteko zigorra amaitu arte.
Lesakaren kasuan, Kondenak Aplikatzeko Parisko Epaitegiak kontuan hartu zuen ETAk bere jarduera behin betiko eten eta urtebetera atzeman zutela. Hala, iazko martxoan onartu egin zuen hura baldintzapean aske uzteko eskaera, Euskal Herriko testuinguru politikoa aldatu izana aintzat hartuta.
