21:00etan ekingo diote Osasunak eta Athleticek Espainiako Kopako azken txanpari; gaur joaneko partida dute biek ala biek Sadarren. RTVErekin ados jarri ostean, ETB1ek euskaraz eskainiko ditu euskal taldeen finalerdietako bi partidak —itzulerakoa apirilaren 4an jokatuko dute, San Mamesen, 22:00etan—. Eta ez hori bakarrik: Osasuna ala Athletic izan, Kopako finala ere —Sevillan jokatuko da— euskaraz eskainiko du kate publikoak.
Gaurko aurrez aurrekoaren kontakizuna Jon Balenziagak egingo du, Naxari Altuna kazetariak eta Txema Añibarro eta Mikel Arruabarrena futbolari ohiek langunduta. Jarraian, Ana Ramosek gidatuta, finalerdiko joaneko partidaren analisia egingo dute saio berezi batean; bertan izango dira Janire Fragua kazetaria, Gorka Iraizoz atezain ohia eta Miguel Angel Lotina entrenatzailea.
Sailkatzen den euskal taldeak finalean aurkari izango du Real Madril edo Bartzelona. Bi taldeek bihar jokatuko dute elkarren arteko joaneko partida, Santiago Bernabeu futbol zelaian (21:00, La 1). Itzulikoa euskal taldeenaren biharamunean egingo dute, apirilaren 5ean, Camp Noun (22:00, La 1).