Tren istripu larria gertatu zen herenegun gauean Greziako Larisa hirian. Bi trenek, bata bidaiariena eta bestea merkantzia trena, elkar jo zuten, eta gutxienez 43 pertsona hil ziren. Erreskate taldeek gorpuen bila jarraitzen dute hondakin artean. 130 lagun artatu behar izan zituzten larrialdi zerbitzuek, eta 66 eraman zituzten ospitalera; haietatik sei ZIU zainketa intentsiboetako unitatean daude. 350 pertsona zihoazen trenean, gehienak hogei urte inguruko ikasleak.
Trenbide sareko arduradunek «giza akats bat» izan zela esan zuten, eta Poliziak Larisako tren geltokiko burua atxilotu zuten. Fiskaltzak zuhurtziagabekeriazko giza hilketaren delitua egotzi dio 59 urteko gizonezkoari. Hark ukatu egin du egotzitakoa, eta esan du errailez aldatzeko agindua eman ziola trenari, baina sistemak ez ziola jaramonik egin.
Tren zerbitzuetako langileek agintariei egotzi diete gertatutakoa. Haien esanetan, oso egoera txarrean dago sarea, eta segurtasun sistemek ez dute behar bezala funtzionatzen. Egun osoko greba antolatu dute gaurko sindikatuek, gertatutakoa salatzeko. «Mina haserre bilakatu da, hildako eta zauritutako lankide eta herritarrengatik. Gobernuek hainbat urtez trenbide sarearen inguruan erakutsitako errespetu faltak ekarri gaitu honaino», salatu du trenbideetako sindikatuak komunikatu batean.
Greziako Garraio ministro Kostas Karamanlisek dimisioa eman zuen atzo, eta bere gain hartu zituen azken urteetako akatsak, eta aitortu egungo sistemak ez dituela betetzen «XXI. mendeko beharrak». Kiriakos Mitsotakis lehen ministroak, ordea, «zorigaiztoko giza akats» bat izan zela esan du, eta «ikerketa independente bat» iragarri.
Protestak
Salonikako ospitalearen kanpoaldean protestak piztu ziren atzo iluntzean. Herritarrak ez dira gobernuaz fidatzen, eta asko beldur dira agintariek ez ote duten baliatuko ikerketa gertatutakoa estaltzeko.
Trenean zihoazen bidaiari eta langileen senideak erietxera joan ziren atzo, euren DNA laginak emateko, hala desagertuak identifikatu ahal izateko. Baina prozedurek luze joko dute, trenetako lehen bagoiak ia erabat suntsituta geratu baitira talkaren eta haren ostean piztutako sutearen ondorioz.
