Interes tasek gehiago igo behar dutela dioten mezuei erregaia bota diete inflazioari buruzko azken datuek. Eurostaten arabera, euroguneko hogei herrialdeetan hamarren bat baizik ez da jaitsi inflazioa otsailean, %8,5eraino.
Analisten espektatibetatik oso urrun geratu da beherakada; Reutersek galdekatutako ekonomistek %8,2 espero zuten, eta %8,3, berriz, Bloombergi erantzun ziotenek.
Urte arteko inflazioak urrian jo zuten goia eurogunean, %10,6an. Orduz gero pare bat puntu apaldu da, baina azken datuak erakusten du jaitsiera askok uste zutena baino motelagoa izango dela.
Are gehiago, gorabeheratsua izan daiteke: otsailean pixka bat igo zen Alemanian, Frantzian, Espainian eta euroguneko beste zazpi herrialdetan, eta jaitsiera orokorra Italian, Belgikan eta beste batzuetan izandako jaitsiera nahiko handiaren ondorio da.
Azpiko inflazioa
EBZko gobernu kontseilua bi aste barru elkartuko da, eta gaur jakinarazitako datuak sendotu egingo du interes tasak beste puntu erdi igotzeko asmoa, %3,5raino. Are gehiago kontuan hartuta azpiko inflazioak ez duela goranzko bidea eteteko itxurarik. Otsailean beste hiru hamarren hazi da, %5,6raino.
Christine Lagarde EBZko presidenteak uste du martxoan gehiago apalduko dela inflazioa, baina hala ere ezinbestekotzat jo du tasak gehiago igotzea, elikagaien garestitzeak inflazioa motelago apalduko duelako.
Eurostaten arabera, azken urtean %15 garestitu dira elikagaiak, alkohola eta tabakoa eurogunean. Energia %13,7 garestiago dago, baina datu hori apalena da 2021eko ekainaz geroztik. Zerbitzuen inflazioa %4,4tik %4,8ra igaro da azken hilabetean, eta horren ondorio da azpiko inflazioaren igoera, indize horren ia bi heren baitira zerbitzuak. Soldaten igoeraren eragina ikusi dute hor adituek; azken urtean batez beste %5 handitu dira.
