Urte bat eta bederatzi hilabete. Denbora hori iraun du Zaratamoko (Bizkaia) Vulcanizados Zuloagako greba mugagabeak. ELA sindikatuak eta zuzendaritzak akordioa egin dute, eta lan hitzarmen propioa izango dute enpresan, lehenengo aldiz. Euskal Herrian indarrean zegoen grebarik luzeenetako bat zen Vulcanizados Zuloagarena, Novaltiakoarekin batera —hiru urte eta erdi daramatzate—.
Orain arte, Espainiako industria kimikoko lan ituna aplikatu diete Vulcanizados Zuloagako langileei —sektore horretan ez dago itunik Euskal Herrian—. Zaratamoko lantegian autogintzaren sektorerako egiten du lan, eta 44 langile aritzen dira.
ELAk azpimarratu duenez, akordioari esker, aurreko hitzarmeneko baldintzak «nabarmen» hobetuko dituzte. Soldatei dagokienez, soldatarik txikiena dutenek (greban zeuden langile gehienek) %17 gehiago kobratuko dute. Orain arte, 17.159 eta 20.688 arteko soldata gordina jasotzen zuten urtean; 1.000 euro pasatxo hilabetean.
Horrekin batera, gaueko lanaren plusa %20 baino gehiago handituko diete. Gaixotasun arrunten bajen osagarriak hobetu dizkiete. Larunbat eta igandeetako lanak arautu eta konpentsatuko dizkiete. Jaiegunetan ez dute lanik egin behar izango. Eta laneko osasunaren arloan hobekuntzak adostu dituzte. Hitzarmen berria 2024ko abenduaren 31ra arte egongo da indarrean, eta 2025etik aurrera enpresaren esparruan negoziatzen jarraitzeko bermea jasotzen du.
ELAk azpimarratu duenez, «grebalarien indarra eta batasuna» funtsezkoa izan da «nahi baino gehiago iraun duen gatazka bati» amaiera emateko. «Langileek agerian utzi dute antolaketaren, borrokaren eta grebaren garrantzia».
