Erasoek ez dute etenik, eta tentsioa eta indarkeria ere gero eta handiagoak dira. Israelek lau palestinar hil ditu tiroz gaur goizean Zisjordania iparraldean egindako erasoan, horietako bat adingabea; gainera, 20 lagun inguru zauritu ditu, eta lau larri daude. Palestinako Osasun Ministerioak eman du erasoaldiaren berri.
WAFA albiste agentziaren arabera, Israelgo indarrak Jenin hiriaren erdigunera joan dira, eta herritarrez betetako kale batean egin dute tiroketa. Hildako lau lagunetatik hiru identifikatu dituzte, eta jakinarazi dute 16, 28 eta 29 urte zituztela. Agentziak gaineratu du Israelek errefortzu militarrak deitu dituela hirian eta errefuxiatuen esparruan, eta tiroka hasi dela herritarren eta haien etxeen aurka.
Israelgo armadak adierazi du Jeningo kanpalekuan «lanean» ari zirela segurtasun indarrak.
Azkenaldian, sarri izaten ari dira sarekadak. Guztira, gutxienez 85 palestinar hil ditu Israelek 2023an: horietako hamasei, adingabeak. Palestinako Osasun Ministerioak emandako datuen arabera, 2000. urtetik ez zen halako urte hasiera bortitzik izan.
