Pentsioak

Pentsioen erreforma motz gelditzen dela aldarrikatu du pentsiodunen mugimenduak

Milaka pertsona bildu dira Bilboko kaleetan 1.080 euroko gutxieneko pentsioa eskatzeko

Pentsiodunek Bilbon egin duten manifestazioko pankarta nagusia. OSKAR MATXIN EDESA
Imanol Magro Eizmendi.
2023ko martxoaren 18a
14:31
Entzun

Euskal Herriko pentsiodunen mugimenduak ozen esan du Bilboko kaleetan Espainiako Gobernuak pentsioak erreformatzeko diseinaturiko lege dekretuko berrikuntzak ez direla aski berientzat. «Erreforma hau ez da duela bost urte mugimendu bezala sortu ginenetik eskatzen eta defendatzen ari garena», aldarrikatu du Ana Agirre bozeramaileak Bilboko udaletxeko eskaileretan. Hiriko erdi aldeko kaleak gurutzatu dituen manifestazio jendetsuaren amaieran. 1.080 euroko gutxieneko pentsioa eskatzeko deialdia izan da, astean zehar 150 pentsiodunek eginiko itxialdi eta baraualdiari amaiera eman diona.

Milaka lagun bildu dira Bilbon, eta deitzaileen arabera, horrek erakusten du pentsiodunen mugimendua «bizi eta osasuntsu» dagoela. Giharra erakutsi du mugimenduak, mobilizazio jendetsua izan baita. Moyua plazatik abiatuta ia Kale Nagusia hartu baitute. Pankartaren atzean baraualdian parte harturiko pentsiodunen taldea zegoen, eta ur botila hutsak eskuan hartuta mobilizatu dira. Aste osoa egin dutenek gaur goizean amaitu dute eta mediku baten onespenarekin hartu dute parte manifestazioan. Txalo ugari entzun dituzte.

Pentsiodunak kritiko izan dira aste honetan aurkezturiko dekretuarekin, oraindik Espainiako Gorteetan onartu beharko dena. «Pentsioak eta eskubideak murrizten dituen» prozesu baten parte dela kritikatu du Agirrek, eta alderdi positiboak izan arren, ez duela 2011koa indargabetzen. Gai berean, gehitu du «betirako» erreforma bat dela, eta pentsiodunek ikusten dutela, «erreformaz erreforma» gero eta zailagoa dela bizi mailari eustea.

Kritika EH Bilduri

Kritikak ez dira hor bukatu, Eusko Jaurlaritzari eta Nafarroako Gobernuari leporatu diote 1.080 eurotik beherako pentsioak hobetzeko mekanismoak ez aktibatzea, eta gogoratu diote hori egiteko eskuduntza badutela. EH Bilduri ere egin diote kritika Espainiako Gobernuaren erreformari babesa emateagatik. Kasu horretan Jon Fano mugimenduko bozeramaileetako bat izan da mintzatu dena: «Alargunen laguntzak hobetzeko lorturiko akordioa ondo dago, baina ez da nahikoa babesa justifikatzeko».

Manifestazioa giro onean garatu da, eta oihu errepikatuenak «1.080 euroko pentsioa, posible da”, «Emakume zein gizon, pentsio berdina» eta «Agintzen duenak agintzen duela, pentsioak defendatu egin behar dira». Irten eta gutxira Bizkaiko Foru Aldundiaren egoitza nagusiaren aurrean etenaldia egin du martxak, eta zahar etxetako egoera hobetzearen aldeko oihuak egin dituzte.

Martxa udaletxeko plazan amaitu da, «pentsiodunen plaza», deitzaileen ahotan. Genero arrakalaren aurkako oihuak entzun dira, eta Agirrek gogoratu du Euskal Herrian emakumezkoen pentsioak gizonezkoena baino %36 txikiagoak direla batez beste. Era berean, gogoratu dute kostuen garestitzea pentsioen eboluzioa baino handiagoa izan dela urte luzez, eta «gero eta zailago» dute hilabete bukaerara iristea. Hori dela, nabarmendu du kalera irteteko arrazoi asko daudela oraindik, eta mugimenduak «borrokan» jarraituko duela.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.