Enpresak
Talgok Alemaniarako 56 trenetarako bagoiak egingo ditu Ribabellosan
Deutsche Bahnek handitu egin du abiadura handiko trenen 2019ko eskaera bat. Talgok inoiz lortutako kontraturik handiena da, 1.400 milioi eurorena.
Aldi luze baterako lana bermatua dute Talgok Ribabellosan (Erriberabeitia, Araba) duen fabrikan. Alemaniako Deutsche Bahn (DB) tren konpainia publikoak abiadura handiko beste 56 tren egiteko eskatu dio Talgori, 1.400 milioi euroren truke. Tren horietako bakoitzak hamazazpi bagoi izango ditu, eta Ribabellosako lantegian egingo dira.
2019an, gehienez abiadura handiko ehun tren egiteko kontratua sinatu zuten Deutsche Bahnek eta Talgok, baina hasieran 23 egiteko eskatu zion. Bagoi horiek egiten ari dira gaur egun Ribabellosan, eta 2024ean jarriko dira martxan.
Talgok azaldu duenez, Talgo 230 plataformakoak dira DBrentzat egingo dituen trenak, eta ICE L markarekin ibiliko dira, Alemania osoan ez ezik, baita nazioarteko bide batzuetan ere; Berlin-Amsterdamen, esaterako.
Tren bakoitzak 562 bidaiarirentzako lekua du: 85 lehen klasean, eta 477 bigarrenean. Azken bagoiak gidatzeko baimena ere izango du, geltoki barruko mugimenduak errazteko.
Inoizko kontraturik handiena
«Deutsche Bahnen eskaera konpainiaren historiako handiena da, eta erakusten du operatzaileak konfiantza duela geure trenek Alemaniako merkatura eramango dituzten berrikuntzetan», nabarmendu du Carlos Palacio Oriol Talgoko presidenteak.
Euskal jatorriko ingeniari batek (Alejandro Goikoetxeak) eta enpresaburu batek (Jose Luis Oriol) 1942an sortutako enpresa bat da Talgo, eta Oñatin (Gipuzkoa) egin zuten lehen trenaren zati bat. Egoitza, ordea, Madrilen dauka, eta han du lokomotorrak egiten dituen fabrika ere. Ribabellosan 700 langile inguru ditu.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
