Eten egin da etxebizitzen salmentaren hazkundea. INE Espainiako estatistika erakundearen arabera, urtarrilean, otsailean eta martxoan 8.005 etxebizitza salerosi ziren Hego Euskal Herrian. Iazko lehen hiru hilabeteetan baino 201 etxebizitza gutxiago dira (-%2,4).
2014tik 2022ra arte gora egin zuen etxebizitzen salmentak, 2020ko salbuespenarekin (-%13,7). Iaz %7,4 handitu zen, nahiz eta urtearen bigarren erdian interes tasen igoera bortitza antzematen hasi zen.
Europako Banku Zentrala uztailean hasi zen interes tasak igotzen, baina etxebizitzaren merkatuan pixka bat lehenago ikusi zen aldaketa, Euriborrak espektatiben arabera funtzionatzen duelako, eta bere mugimenduak aurreratu egiten dituelako. Horrela, iazko lehen hiru hilabeteetan negatiboan izan zen Euriborra (-%0,477 urtarrilean, -%0,335 otsailean eta -%0,237 martxoan), baina apirilean itzuli zen maila positibora, eta orduz gero etenik gabe egin du gora. Apirilean %3,757ra heldu zen eta maiatzean hortik gora bukatuko du: %3,814ko batezbestekoa du orain arte.
Igoera bizkor horrek eragin du etxebizitza hipoteken bitartez erosten dutenei asko igo zaiela hilero ordaindutakoa. Bai mailegua tasa aldakorrarekin ordaindu behar dutenei (Euriborrarekin), baita tasa finkoa aukeratzen dutenek ere, bankuek asko garestitu dituztelako azken mailegu horiek ere.
Horrela, iaz 150.000 euroko mailegu bat hartu zuenak, Euriborrarekin eta %0,5arekin, 25 urtean itzultzekoa, hilean 500 euro inguru ordaindu zituen iazko maiatzean, baina 800 euro ordaindu beharko lituzke orain.
Igoera apaldu egiten da maileguan ordaindu gabe geratzen dena apaltzen den heinean, interes tasa ordaintzeke dagoen zati horren gainean kalkulatzen baita.
