Euskal Herriko Pentsiodunen Mugimenduak deituta (EHPM), Hego Euskal Herrian gutxieneko pentsioa 1.080 eurora iristeko eskatu dute ehunka lagunek oinezko martxen bitartez. Astearte eguerdian bi martxa abiatu ziren Gasteizera, Bilboko eta Bergarako (Gipuzkoa) udaletxeen paretik. Atzo, berriz, Aguraingo (Araba) taldea abiatu zen. Gaur iritsi dira Arabako hiriburura, eta manifestazioa egin dute guztiek batera.
Abiatu da pentsiodunen manifestazioa. Gasteiz iparraldetik hiriaren erdigunera joango dira, eta handik gero Eusko Legebiltzarrera, euskal erankundeei eskatzeko osa ditzatela gutxieneko pentsioak 1.080 eurokoak izan arte. @berriapic.twitter.com/MJtfIwVUs8
— Aitor Biain (@Aitorbi) May 25, 2023
Bidea oinez egiterik izan ez dutenak autobusez joan dira, manifestazioan parte hartzera. Gipuzkoatik, esaterako, sei autobus heldu dira. Gasteiz iparraldean elkartu dira denak, Zuberoa plazan, eta handik abiatu dira protestan Eusko Legebiltzarrera. Hiriaren erdigunera iristean sindikatuetako ordezkariak eta beste eragile batzuk ere batu dira protestara. Azkenean, jendetza batu da Plaza Berrian, eta ozen entzun da «pentsio duinak!» aldarria. Eusko Legebiltzarra inguratu ondoren heldu da manifestazioa amaiera puntura.
Jendetza batu da Gasteizko Plaza Berrian, Euskal Herriko Pentsiodunen Mugimenduak deitutako manifestazioan. “Pentsio duinak” ozen ari dira aldarrikatzen. @berriapic.twitter.com/AmPZIDJivF
— Aitor Biain (@Aitorbi) May 25, 2023
Martxen bitartez, euskal erakundeei eskatu nahi diete gutxieneko pentsioak 1.080 euroraino osatzeko. Halaber, nahi dute Espainiako Gorteetan ordezkaritza duten alderdiek pentsioen azken erreformaren lege proiektuaren eztabaida baliatzea erretiro adina berriro 65 urtean jartzeko, eta pentsioa osorik jasotzeko kotizatu beharreko urteak hamabostera jaisteko.
EHPMren arabera, erreformaren ondorioz gutxienez 743 euroko pentsioa jasoko du aurten ezkontidea ardurapean ez duen pentsiodunak, hamalau ordainsaritan. Azken erreformaren bitartez, 873 eurora igoko da 2027rako.
